Budyšin (VaŽ/SN). Cyłkownje 19 dźěći z Hornjeje a Delnjeje Łužicy a samo wobdźělnik z Münstera wopyta w jutrownych prózdninach mjeztym hižo pjate hudźbne prózdninske lěhwo w Serbskim ludowym ansamblu w Budyšinje. Tež wčera młodźi hudźbnicy pod nawodom Jana Brězana intensiwnje na swojich instrumentach zwučowachu.

W srjedźišću prózdninskeho lěhwa steji nazwučowanje pjeć serbskich ludowych spěwow, kotrež buchu ekstra na młody orchester přiměrjene. Hudźbny wuslědk tutoho proboweho tydźenja prezentuja dźěći jutře, 25. apryla, w 17 hodź. na zakónčacym koncerće na žurli Serbskeho ludoweho ansambla.

Jedyn z wobdźělnikow je Benjamin Meyer z Münstera, kotryž prawidłownje za čas jutrownych prózdnin swoju swójbu we Łužicy wopytuje. Wón hraje hižo wosom lět eufonium a štyri lěta pozawnu. Wón so lětsa druhi raz na prózdninskim lěhwje wobdźěli. „Tuta zhromadnosć so mi wosebje lubi, a sym přez instrumentowe lěhwo hižo nowych přećelow zeznał“, Benjamin­ powěda.