Jutry w Serbach běchu pisane. W Hornjej, srjedźnej a Delnjej Łužicy pěstowachu ludźo dojutrowne a jutrowne tradicije, nałožki a wobrjady. Wjeršk w Hornjej Łužicy běchu bjezdwěla křižerjo, kotřiž su jutrowne poselstwo hordoznje do susodnych wosadow a wjeskow njesli a wozjewjeli. Dohromady bě jich lětsa 1 376 křižerjow w dźewjeć serbskich procesionach. Krasne słónčne wjedro přiwabi wjele přihladowarjow zbliska a zdaloka. A w kćějacej přirodźe – Božej stwórbje – su kěrluše pyšnych křižerjow ćim rjeńšo klinčeli. Wjele ludźi bě z kolesom po puću a je sej wšelake procesiony wobhladało. W kóždym mějachu lětsa nowačkow a slěbornych jubilarow. Jenički jubilar ze złotym wěnčkom we wšitkich křižerskich procesionach bě Ambrož Brězan, kotryž je w Kulowskim procesionje sobu jěchał.