Biden a Putin Scholzej gratulowałoj
Washington/Moskwa (dpa/SN). Prezident USA Joe Biden je Olafej Scholzej (SPD) k powołanju za zwjazkoweho kanclera Němskeje gratulował. „Wjeselu so na to, sylne styki mjez swojimaj krajomaj natwarjeć a wusko hromadźe dźěłać, zo bychmy hladajo na globalne wužadanja dźensnišeho časa postupy docpěli“, Biden wčera zdźěli. Wospjet wón potwjerdźi, zo ma Němsku za jednoho z najwažnišich zwjazkarjow. Pod jeho předchadnikom Donaldom Trumpom běchu poćahi skerje napjate.
Ruski prezident Wladimir Putin je nowemu zwjazkowemu kanclerej Olafej Scholzej gratulował a dźěło Angele Merkel wuzběhnył. „Liču z tym, z wami do konstruktiwneho dialoga stupić a zhromadnje na aktualnych bilateralnych kaž mjezynarodnych temach dźěłać“, piše Putin w zbožopřejnym telegramje. Wón dźakowaše so Angeli Merkel za zhromadne dźěło minjenych 16 lět. „W stajnym kontakće smój spytałoj, samo w najćešich połoženjach wupuć nańć.“ Putin chce komunikaciju z njej dale pěstować.
Zamołwitosće přerjadowali
Změny přisłušnosće w ministerstwach noweho zwjazkoweho knježerstwa
Berlin (dpa/SN). Nowe zwjazkowe knježerstwo amploweje koalicije SPD, Zelenych a FDP je mjez ministerstwami zamołwitosće předewšěm za klimowu politiku a digitalne naležnosće zdźěla zasadnje znowa rjadowało. Tak budźe wonkowna ministerka Annalena Baerbock (Zeleni) přichodnje tež za mjezynarodnu klimowu politiku zamołwita. To je nowy zwjazkowy kancler Olaf Scholz (SPD) rozsudźił. Baerbock změje Němsku na mjezynarodnych klimowych konferencach zastupować.
Nowy hospodarski minister Robert Habeck (Zeleni) dóstanje z wobswětoweho ministerstwa přisłušnosć za nutřkokrajnu klimowu politiku. Wón je tuž tež přisłušny za zakoń wo škiće klimy, štož je jedyn z centralnych zakonjow klimoweje politiki noweho knježerstwa.
Nadźija poněčim zaso přiběra
Berlin (dpa/SN). Mjeztym druhu wot koronakrizy postajenu nazymu sej „generacija srjedźizny“ po najnowšim přepytowanju nadźiju poněčim zaso wróćo zdobywa. Mnozy pak su přeco hišće stresowani a starosća so stupacych płaćiznow dla. To je wuslědk naprašowanja Allensbachskeho Instituta za demoskopiju w nadawku zwjazka zawěsćernjow Němskeje, kotryž su wčera w Berlinje předstajili. 37 procentow woprašanych w starobje 30 do 59 lět zhladuje zaso optimistisce do přichoda. To drje je hišće daloko zdalene wot niwowa do koronapandemije, ale jasnje wjace hač lońšich 22 procentow ludźi.
Lěta 2020 čuješe so kóždy třeći stresowany, mjeztym je jich 39 procentow. Wo stres stara so začuće, zo njeje žiwjenje hižo planujomne, institut zwěsći. Najebać to so nalada mjez ludźimi zaso polěpša. Swoje financne połoženje posudźuje „generacija srjedźizny“ jako stabilnu abo přewažnje pozitiwnu. Rozdźěle wobsteja mjez chudšimi a bohatšimi ludźimi. Jedna z najwjetšich starosćow je strach, zo so swójske dźěći z koronawirusom natyknu a schorja.
To a tamne (09.12.21)
Dźesać kilogramow ćežki čwak złota su w USA za wjele pjenjez přesadźowali. Tak mjenowany „Alaska centennial gold nugget“ je na wčerawšej awkciji 750 000 dolarow (něhdźe 661 000 eurow) wunjesł, kaž dom Heritage Auctions w texaskim Dallasu zdźěli. Dulu złota běchu 1998 w Alasce našli. Priwatny zběrar ju pozdźišo kupi, a jeho potomnicy přewostajichu złoto nětko awkciskemu domej.
Z Angelu Merkel zaso pućować hić, na to so znaty krosnowar Reinhold Messner jara wjeseli. 77lětny z njej a jeje mužom Joachimom Sauerom mjeztym wjele lět w Južnym Tirolu po horach pućuje. „Nětko njebudźe wona wjace jako šefina knježerstwa po puću ale jako politiska rentnarka“, so Messner wjeseli. Wón je hordy na to, zo je sej Merkel na jeho radu južnotirolske hory wupytała, dokelž móže tam woměrje dowol činić.
Lěkarjo: Přemało šćěpiwa
Berlin (dpa/SN). Zwjazki lěkarjow skorža njespušćomnosće při dodawanju šćěpiwa pře koronu dla. Zaměr 30 milionow šćěpjenjow hač do hód njeje cyle njerealistiski, měni šef zjednoćenstwa kasowych lěkarjow Andreas Gassen. Politika pak móžne wuspěchi haći, wón praji. Lěkarjo a strowotniske zarjady běchu tónle tydźeń 6,5 milionow dozow skazali. Dóstali pak su runje 2,9 milionow. Tež zwjazk domjacych lěkarjow tuchwilne połoženje kritizuje.
Spahn: Debata wažna
Berlin (dpa/SN). Rozžohnowacy so minister za strowotnistwo Jens Spahn (CDU) je hladajo na powšitkownu winowatosć šćěpjenja přećiwo koronje dale skeptiski. Najebać to ma wón debatu wo naležnosći za wažnu. W Němskej je dwanaće milionow ludźi nješćěpjenych, štož je přewjele, Spahn w telewiziji ZDF wuzběhny. Wón na to skedźbni, zo dyrbja na intensiwnych stacijach předewšěm nješćěpjenych zastarać. Tohodla je za to, prawidło 2G w mnohich wobłukach tež cyłe lěto 2022 konsekwentnje přesadźić.
Omikron budźe problem
Politikar SPD Olaf Scholz (nalěwo) je dźewjaty zwjazkowy kancler ...
Za bojkot hrow w Chinje
Za konstruktiwnu opoziciju
Wjeršk prezidentow bjez wuslědka
Moskwa (dpa/SN). Po widejowym wjeršku ruskeho statneho prezidenta Wladimira Putina a jeho kolegi z USA Joewa Bidena njewidźi Krjeml žane rozrisanje wažnych prašenjow. „Myslu sej, zo połoženje ani nas ani Američanow njespokoja“, rjekny wonkopolitiski poradźowar Jurij Ušakow dźensa powěsćerni Interfax. Poćahi dawaja přičinu so starosćić. Wobě stronje pak stej swoju wolu pokazałoj dale na tym dźěłać.
Wjeršk mjenowaneju prezidentow wčera wječor bě hižo po dobrymaj hodźinomaj nimo. Poprawom běchu z tym ličili, zo wuměna myslow dlěje traje. Nastupajo konflikt na Ukrainje su pozicije dale sprostnjene. Joe Biden bě tež wo móžnych sankcijach rěčał. „Naš prezident na to rjekny, zo njejsu sankcije za Rusku ničo noweho a zo nimaja za USA žane pozitiwne wuskutki“, Ušakow zwurazni.
USA wumjetuja Ruskej koncentraciju wójska njedaloko ukrainskeje mjezy a přihot inwazije. Ruska to wotpokazuje a Ukrainu winuje, zo je 120 000 wojakow na wuchodźe kraja zaměstniła.
