Lětuša hornjoserbska inscenacija za hłowny dom Budyskeho dwurěčneho dźiwadła njese napjatosć we sebi: Z Choćebuza pochadźacy dramatikar Oliver Bukowski (lětnik 1961) je wukubłany filozof a psychologa – a wón poskića přihladowarjam k rozmyslowanju pohnuwacu nowu hru z titulom „Za brězami“.
„Při wšej fascinaciji za prawobydlerjow swěta zabywamy, zo mamy direktnje před nosom indigeny lud.“ A lědma štó w Němskej wo tym prawje wě. Tak započnje rozhłosownik dr. Geseko von Lüpke swoje hodźinske wusyłanje wo Serbach w Bayerskim rozhłosu, kotrež móžemy 22. měrca słyšeć. Zajimawe wšak je, z kotreje perspektiwy wón na Serbow zhladuje. Von Lüpke je wjele serbskich politikarjow, institucijow a komunow wopytał. Sam wón praji, kak njeznate jemu to wšo je, ale jeho fascinuje, kajku skedźbnosć Serbja naraz wubudźeja.
Jako wuńdźe před dźesać lětami prěni zwjazk, fotografam w serbskej Łužicy wěnowany, njeby sej čłowjek myslił, zo nam Ludowe nakładnistwo Domowina mjeztym hižo šesty a sedmy tajki poskića. LND je šansu za tónle swojorazny ediciski rjad spóznało. Dźakować ma so čitarstwo tež Jürgenej Maćijej, kiž bě sej namakanje, wupytanje, rjadowanje a přihot fotow nabrěmjenił. Wón ma za debjenki tohole žanra wótre wóčko, wušiknu ruku a nimo toho wutrajnosć, w zawostajenstwje fotografow a archiwach wone negatiwy wuhrjebać, kotrež knihu na kóncu debja. Ćim bóle płaći to za najnowšej zwjazkaj „Wotmolowane – Mit Licht gemalt“. Štóž njeje sej hač do spočatka měrca w Budyskim Serbskim muzeju pokazanu wustajeńcu před wjace hač sto lětami „wotmolowanych“ – kaž Serbja tomu rjeknychu – serbsko-łužiskich fotow wobhladał, je něšto zakomdźił; a ćim bóle tón, kiž sej listowanje, wobhladanje fotow a čitanje tekstow w nowostkomaj njepopřeje.
Rumnostne wuměnjenja we Worklečanskim šulskim twarjenju načinjeja gmejnje dźeń a wjetše starosće. Tole bě na wčerawšim posedźenju gmejnskeje rady wusłyšeć.
Worklecy (SN/MWj). Ličba šulerjow na Worklečanskej zakładnej a wyšej šuli „Michał Hórnik“ dale přiběra. Štož klinči najprjedy raz zwjeselace, načinja gmejnje přiběrajcy brjušebolenje. Rumnostne wuměnjenja su dawno wučerpane. A za nowe šulske lěto předleži za wyšu šulu 31 přizjewjenjow do 5. lětnika. Hač wutworja jednu rjadownju abo dwě, dotal znate njeje. Jasne pak je, zo w šulskim twarjenju hižo rumnosće za hort wužiwać njemóža. Tohodla je wjesnjanosta Franc Brusk (CDU) swojemu Njebjelčanskemu koleze Tomašej Čornakej list pisał. W nim rysuje prekerne rumnostne wuměnjenja nastupajo hort. Tuchwilu staraja so w nim wo 85 dźěći. Za přichodne šulske lěto předleži 22 nowych přizjewjenjow. Z tym je móžna kapacita Worklečanskeje gmejny docpěta. Tohodla Brusk w lisće prosy, zo by Njebjelčanska gmejna wot noweho šulskeho lěta za 22 hortowych šulerjow 3. a 4. lětnika sama rumnosće přewostajiła a so w nich wo holcy a hólcow starała.
Wojerecy (MFü/SN). Dypkownje k zazběhej nalěća a k spočatkej lětnjeho časa přewjedźe Wojerowska Łužiska hala za tydźeń mjeztym hižo 23. jutrowne wiki. 25. a 26. měrca móža so wopytowarjo we wšelakich wobłukach Łužiskeje hale při stejnišćach 80 wikowarjow a rjemjeslnikow na jutry nastajić, dariki abo dekoracije kupić abo je sami paslić.
22 debjerjow jutrownych jejkow demonstruje swoje kmanosće, ale tež hornčerjo, škleńčerjo, kobjelerjo a módroćišćerjo chcedźa tam swoje wudźěłki poskićić. Mnohe wobliča budu wopytowarjam ze zašłych lět znate, někotre pak budu nowe, kaž te złotnikarskeje mišterki Sabriny Lakisoveje z Berlina. Wo kulturne wobrubjenje na jewišću staraja so regionalne wuměłske a ludowuměłske ansamble. Krabatowa drastowa skupina (sobotu w 16 hodź.), rejwanska skupina Wojerowskeho karnewaloweho kluba (njedźelu w 14 hodź.) a Brětnjanska drastowa a rejwanska skupina (njedźelu w 16 hodź.) předstaja žiwjenje, dźěło a swjedźenje serbskich wobydlerjow Wojerowskeho regiona.
Spale (AK/SN). Dodawk k hospodarskemu planej 2017 je Kulowska měšćanska rada na swojim zašłym posedźenju wobzamknyła. To bě trjeba, dokelž jewjachu so při někotrych inwesticijach korektury, kaž komornik Thomas Woelke rozłoži. Za ponowjenje ewangelskeje cyrkwje a Krabatoweje zakładneje šule wotpohladachu spočatnje 493 000, nětko je to 504 000 eurow.
Jako jedne z wjetšich projektow chcedźa lětsa kapałku na Spalowskim pohrjebnišću dospołnje ponowić. Prěnjotnje planowachu za to 240 000 eurow. K tomu přińdu nětko pjenjezy, kotrež loni wotwołali njeběchu. Cyłkowna suma wučinja tuž 394 000 eurow. Z toho je 98 000 eurow swójskich srědkow města a 296 000 eurow spěchowanja. W dodatnym etaće zaplanowane je dale 20 000 eurow za nowe jězdźidło měšćanskeje zymskeje słužby a 15 000 eurow za wuhotowanje dobrowólnych wohnjowych woborow.
Róžant (JK/SN). Móžny nowotwar Ralbičanskeje pěstowarnje je čłonow gmejnskeje rady Ralbicy-Róžant na jich wčerawšim posedźenju zaběrał. Kaž druhi zastupowacy wjesnjanosta Michał Šołta (Swobodne wolerske zjednoćenstwo Delany) zdźěli, poby wón ze zamołwitej za financy w zarjadniskim zwjazku Při Klóšterskej wodźe Francisku Čapikowej spočatk měrca na Budyskim młodźinskim zarjedźe, zo byštaj so wo tym informowałoj, hač je móžno w Ralbicach nowu pěstowarnju twarić a kotre móžnosće financowanja maja. Do toho bě so wón z nawodomaj wyšeje a zakładneje šule kaž tež ze zastupjerjemi Serbskeho šulskeho towarstwa jako nošerjom pěstowarnje wo situaciji w šulomaj, horće a pěstowarni dorozumił. Wuslědk bě, zo je za wšitkich najlěpše rozrisanje, ručež móžno nowu pěstowarnju twarić. Dotalna hodźała so potom jako hort wužiwać. Hižo nětko maja za njón wuwzaćne rjadowanje, wšako dyrbi so tam wšědnje 110 hortowych dźěći zastarać. Rumnosće w šulomaj hižo ani za wuwučowanje njedosahaja, wo horće ani njerěčo.
Pjenjezy kradnyli
Nuknica. Njeluby wopyt mějachu spočatk tydźenja w Nuknicy. Kaž nowinski rěčnik Zhorjelskeje policajskeje direkcije zdźěli, su so tam njeznaći wutoru w běhu dnja do bydlenskeho domu burskeho statoka zadobyli. Při tym mějachu sej skućićeljo poměrnje lochko, dokelž njeběchu durje zamknjene. Z běrowoweje rumnosće pokradnychu listowej wobalce. W kóždej z njeju bě štyricyfrowa suma pjenjez, kaž w policajskim reporće dale rěka. Kriminalisća pad přepytuja.
Proces spěšnišo zakónčeny
Zhorjelc/Wojerecy. W procesu morjenja dla chce chłostanska komora Zhorjelskeho krajneho sudnistwa hižo dźensa wusud wozjewić. Kaž rěčnik sudnistwa Jörg Küsgen zdźěli, móžachu zběranje dopokazow spěšnišo zakónčić hač planowane. 33lětnemu Afghaničanej wumjetuja, zo je loni w awgusće we Wojerecach swoju žonu morił.
Dźěle domow spotorhaja
Budyšin. Dźěle jednotliwych zdźěla historiskich domow na Budyskej Nutřkownej Lawskej chcedźa w aprylu spotorhać, informuje měšćanske zarjadnistwo. Hižo w lěće 2006 chcychu je ponowić, wjacore z nich pak so sypnychu. Přez lěta nochcychu za to ani wobsedźer ani twarske firmy winu přewzać.
Planuja swjedźenski ćah