Budyšin (SN). Dalše zhromadne dźěło steješe w srjedźišću zetkanja čestnohamtskich pomocnikow ćěkancow a zwjazkarstwow wokrjesa z krajnym radu Michaelom Harigom (CDU) minjeny štwórtk w Budyšinje. Pozadk rozmołwy bě dwělomny kontakt naměstnika krajneho rady Uda Wićaza z čłonom NPD. Po wozjewjenju chat-protokolow je towarstwo Witajće do Budyšina zhromadne dźěło z krajnym zarjadom sčasami zastajiło, njemějo hižo dowěru do nawodnistwa wokrjesa.
Předsydźa frakcijow wokrjesneho sejmika a krajny rada su wobzamknyli, zo nima Udo Wićaz zarjad za wukrajnikow hižo zamołwjeć. Nimo toho wobzamknychu, zo měli so zwjazkarstwa a towarstwa zetkać. Něhdźe 80 kmótow, pomocnikow ćěkancow a zastupjerjow iniciatiwow je nětko přeprošenje sćěhowało a na rozmołwu přišło.
Barcelona (ČŽ/K/SN). Parlament Katalonskeje, awtonomneje prowincy Španiskeje z něhdźe 7,5 milionami wobydlerjow, je schwalił zakoń wo přewjedźenju referenduma nastupajo jeje njewotwisnosć. Ze 135 zapósłancow ludoweho zastupnistwa je 72 za to hłosowało a jědnaće so hłosa wzdało. Zapósłancy opozicije su z protesta žurlu wopušćili. Tónle zakoń je wažny, zo móhli ludowe wothłosowanje scyła wotměć. Terminowane je wone na 1. oktober.
W Madridźe je Barcelonske separatistiske počinanje rozhorjenosć zbudźiło. Knježerstwo nablaku připowědźi, zo wobroći so na wustawowe sudnistwo z próstwu, debatu anulować. Ministerski prezident Mariano Rajoy chce wustawowemu sudnistwu namjetować, napołožić čłonam katalanskeho parlamenta zamołwitosć za to, zo su wothłosowanje wo zakonju k přewjedźenju referenduma docyła zmóžnili. Tež katalanske statne rěčnistwo je hižo zdźěliło, zo předsydstwo parlamenta na Najwyšim sudnistwje Katalonskeje wobskorži.
Drježdźany (dpa/K). Lěsy – dalokož njepřewostaja so přirodźe – su runja zahonam žita wupłód skutkowanja čłowjeka, kotryž dyrbi je tuž tohorunja wěcywustojnje wobdźěłać a hladać. To wobstaruja lěsnicy. Zo hodźało so tele naročne dźěło spjelnić, je po słowach prezidenta Sakskeho lěsnistwa prof. dr. Huberta Brauna „trěbne, tež za dalše porjadne wobhospodarjenje a prawe hladanje lěsow derje wukubłanych a angažowanych ekspertow zdobyć“.
Lěpšeho pomjenowanja hač babylěćo drje njemóhli Ralbičenjo za swój wot lěta 2002 stajnje w septembru přewjedowany wjesny swjedźeń nańć. Mjeztym zo bě loni na wšěch třoch dnjach swjedźenja chětro horco było, dyrbjachu so wopytowarjo lětsa trochu ćoplišu drastu woblec.
Ralbicy (aha/SN). K zazběhej pjatk wječor nastupi 14 wohnjowych woborow, mjez nimi pjeć dorostowych, k hašenskemu wubědźowanju pod swětłomjetakami. Najlěpje wotrěznychu wobornicy z delnich Sulšec před skupinu z Róžanta/Sernjan a zastupnistwom ze Smjerdźaceje. Mjez młodźinskimi cyłkami wobsadźi dorost z Pěskec prěnje městno.
Sobotu su štyri mustwa w ludobulu mocy měrili, a wječor witaše wjesna předstejićerka Hana Krawcowa hosći w połnje wobsadźenym stanje na dwuhodźinski program. Tradicionelnje wuhotowa jón něhdźe 50 sobuskutkowacych wšěch generacijow. Hana Krawcowa program přewažnje serbsce moderěrowaše. Swój dźesaćlětny jubilej swjećeše wjesna kapała Brodače. Wjele připóznaća žněješe wot wjesnych muži nawjerćany widejofilm „Wjelk přećiwo hajnikam“.
Spale (AK/SN). Narowny kamjeń z wopomjatnej taflu hnydom napadnje. Pódla zachoda do kapałki na Spalowskim kěrchowje dopomina wón na serbskeho ewangelskeho fararja Křesćana Kubicu (1805–1861). „To je hódne městno. Křesćan Kubica je jedna ze Spalowskich historiskich wosobinow. Na te wašnje jeho hódnje wopominamy“, praji wjesny chronist Reinhold Weise, čłon Spalowskeho domizniskeho towarstwa. Jeho čłonojo su narowny kamjeń do Spal přenjesli a jón při kapałce nastajili. Nimo toho připrawichu informacisku taflu. Trěbne 450 eurow je towarstwo najprjedy raz same zapłaćiło.
Trjebin (AK/SN). Kónc decembra ma nowa městnosć za wot brunicoweje jamy Wochozy II potrjecheny Miłoraz wěsta być. Tole podšmórny wjesny předstejićer Waldemar Locke na zašłym posedźenju Trjebinskeje gmejnskeje rady. „Tuchwilu faworizuje 78 procentow wšěch Miłorazanow přesydlenje do Slepoho. Koncern LEAG pak by tež Trjebin za móžnu sydlensku městnosć měł“, wón rozłoži.
Miłoražanska wjesna rada, Locke potwjerdźi, ma městnosć w sewjernym dźělu Slepoho za najkmańšu. Tam měješe Nowe Rowno nastać. Tež Zhorjelski krajnoradny zarjad móhł tomu přihłosować. „Spjelnimy nětko swoje domjace nadawki a přewjedźemy naprašowanje“, praji předstejićer. Najprjedy chcedźa naprašniki zdźěłać, potom na informaciske zarjadowanje přeprosyć a skónčnje naprašniki wobydlerjam rozdźělić. Njewotwisny běrow ma tole přewodźeć.
Z městna njezboža pěši ćeknyła
Minakał. 34lětna žona bě we wčerawšich rańšich hodźinach mjez Minakałom a Lipičom po puću, jako ze swojim Suzukijom z jězdnje zajědźe a do štoma prasny. Zraniła drje so šoferka njeje, na awće pak nasta něhdźe 10 000 eurow škody. Žona městno njezboža na to pěši wopušći a nóžkowaše domoj. Tam ju policija pozdźišo wuslědźi. Při kontroli zastojnicy zwěsćichu, zo wšak měješe wona 1,84 promilow alkohola w kreji.
Chrósćicy. Drježdźansko-Mišnjanski biskop Heinrich Timmerevers je wčera w Chrósćicach 80 młodostnym sakrament firmowanja wudźělił. Tež holcy a hólcy klóšterskeje wikarije běchu mjez firmujomnymi. Wjetšina holcow bě w družčej drasće. Tójšto kmótrow bě tohorunja w swjedźenskej drasće. Božu mšu wobrubił je Chróšćanski cyrkwinski chór. Bernadet Hencyna je jón posledni raz nawjedowała. Za wjelelětne spomóžne skutkowanje je so jej wosadny farar Měrćin Deleńk wutrobnje dźakował.
Zetkać a so serbsce rozmołwjeć
Berlin. Přichodne Serbske blido wotměje so štwórtk, 14. septembra, w 16 hodź. w hosćencu EINSTEIN KAFFEE na Friedrichowej 206. Hosćenc je direktnje pódla bywšeho namjezneho přechoda Checkpoint Charlie. Štóž ma lóšt a chwile so na měsačnych zetkanjach k hajenju maćeršćiny w cuzbje wobdźělić, je lubje witany. Po tym zo su so wjacori ze stolicy a wokoliny w lětnich prózdninach na rěčnych kursach hornjo- abo delnjoserbšćiny wobdźělili, maja za Serbskim blidom dobru składnosć, swoje kmanosće nałožować a skrućeć.