Z wudaća: wutora, 14 nowembera 2017

Budyšin. Pod hesłom „Rěče dožiwić“ přeprosy Serbski šulski a zetkawanski centrum na Listowej wutoru, 21. nowembra, na dźeń wotewrjenych duri. Wot 16 hodź. předstaja tam dźěło na Serbskim gymnaziju a na wyšej šuli we wšitkich fasetach. Při tym njedožiwja wopytowarjo jenož wučbu serbšćiny, ale tež šulerjow, kotřiž w němčinje debatuja, jendźelšćinu kaž tež započatkarsku wučbu čěšćiny, francošćiny a rušćiny. Runje tak zmóžnja kulturne skupiny dohlad do swojeho dźěła. Hosćo móža wučerjam za dudy abo huslički přez ramjo hladać, so k­ rejwanju animěrować dać, chóram připosłuchać­ abo dźiwadłowu skupinu wobdźiwać. Dźěći móža so lego-roboterom zaběrać. Wučerjo chemije a fyziki přewjedu we 18.15 hodź. eksperimenty w awli, hdźež budu samo­ škrički lětać. Wo ćělne derjeměće budźe postarane.

Bukecy (JKr/SN). Nazymski koncert je nimo ptačokwasneho zarjadowanja SLA kruty wobstatk kulturneho žiwjenja Bukec a wokoliny. Njezadźiwa tuž, zo bě zawčerawšim popołdnju žurla Bukečanskeje Wjesneje hospody zaso derje pjelnjena. Zo namakaš tu stajnje zaso přichileny publikum, wo tym móžachu so Smjerdźečanscy rejwarjo a rejwarki runje tak kaž hudźbnicy folklorneje skupiny Sprjewjan přeswědčić. Woni wšak su Bukečanam takrjec stari znaći, kotřiž wědźa zabawny program poskićeć – posledni raz běchu tu před pjeć lětami nazymski koncert wuhotowali.

Budyšin. Zjawny přednošk poskići Budyski Serbski institut jutře w 10 hodź. Martin Munke porěči na temu „Digitalna krajinowěda w Sakskej – Wužadanja a aktualne perspektiwy“. Zajutřišim, štwórtk, w 14 hodź. přednošuje prof. dr. Roland Meyer z Berlinskeje Humboldtoweje uniwersity na temu „Serbske datiw-diatezy a jich přiwuzne“. Wobaj přednoškaj budźetej w němskej rěči.

Nakładne awto so zwróćiło

Dobrošecy. Swoju jězbu z wulkim nakładnym awtom wčera na statnej dróze S 109 je sej jeho šofer zawěsće hinak předstajił. Krótko po 11 hodź. zajědźe wón přejara na kromu puća, suny so z jězdźidłom do přirowa a so zwróći. Nakładowane 22 tonow třěšnych cyhelow wusypny so na polo. Nimo toho so Lkw chětro wobškodźi a dźěl diesela z njeho wuběža. Nakładne awto a třěšne cyhele rumować je hač do wječornych hodźin trało.

FSV Łuty

– ST Marijina hwězda 1:1 (1:0)

Zestawa hosći: Schmidt – Wróbl, Škoda, Pakoßnick, R. Hawš, Peschmann, Kuring, O. Hawš, Rab, Winkler (80. Prasse), Eldor (80. Čornak)

W dosć dobrej partiji wokrjesneje koparskeje ligi-stafle II stej cyłkaj FSV Łuty a ST Marijina hwězda 1:1 hrałoj. Na derje preparowanym hrajnišću prócowaštej so wobaj cyłkaj najprjedy wo porjadny natwar. Prěnjej móžnosći měješe za hosći Alex Winkler. W 10. min. třěli wón bul snadnje wyše wrotow, dwě mjeńšinje pozdźišo do łaty. Na tamnym boku poradźi so Łutowčanam z prěnim prawym nadběhom w 22. min. nawjedowanje, štož tróšku překwapi. Po rjanej flance Ali Eldora zhłójčkowa Matijas Wróbl bul swobodnje stejo nimo wrotow. Wotnětka hosćićel hru postajowaše, njemóžeše pak dalše šansy k 2:0 wužić.

Z 78 kehelemi wjac su kehelerjo Sokoła Ralbicy/Hórki sobotu na domjacych čarach w Rakecach hosći z Kamjenca přewinyli. Jurij Šiman (zady 3. wotlěwa) spowala njewšědne 432 drjewow. Wón bě najwustojniši keheler hry a najlěpši sportowc hrajneho dnja. Tobias Mikławšk (prědku naprawo) a Gisbert Šiman (prědku nalěwo) slědowaštaj ze 429 a 428 kehelemi. K druhemu dobyću Sokoła w štwórtej hrě přinošowachu hišće Roberto Wjenk (prědku srjedźa), Joachim Kral (stejo nalěwo), Handrij Hejduška (zady 2. wotprawa) a Hermann Woko (zady 2. wotlěwa). Foto: Markus Brüss

Awtor dźensa

André Strelow

W zašłej kolumnje pisach wo prěnich nazhonjenjach zasadźenja widejowych sudnikow w zwjazkowej koparskej lize. Problemy dale wobsteja, runje hladajo na fakt, w kotrym wokomiku widejowy sudnik docyła zakroči. Třěšny zwjazk DFB je nětko jasne prawi­dła wozjewił. Hač so situacija polěpši, to pokazaja nam přichodne tydźenje a měsacy. W tym nastupanju je znaty koparski sudnik Manuel Gräfe dalše diskrepancy w zwisku z posudźowanjom sudniskich wukonow narěčał, kritizujo, zo wukony zdźěla njeobjektiwnje nastawaja. Posudźowanja so zdźěla skoriguja, tak, kaž su trěbne. Nimo toho zhotowištaj zamołwići za sudnikow Herbert Fandel a Helmut Krug lisćinu ze sudnikami, „rjadowanu bóle po stykach a nosu“. Tele wuprajenje Gräfy je dalši znaty sudnik Felix Brüch podšmórnył. To bě wězo sylny tobak a na boku DFB wulki wukřik.

CVJM Zhorjelc

– Viktoria Worklecy 3:2

(26:24, 19:25, 22:25, 25:22, 15:12)

Za hosći hrajachu: Jan Bětnar, Clemens a Ludwig Eckert, Stefan Gedik, Jurij Lipič, Marcel Rjelka, Daniel Wałda a Stephan Wjeńka

Njezbožo ze zranjenjemi ma prěnje volleyballowe mustwo muži Viktorije Worklecy tež w nowej hrajnej dobje. Tak a tak mały kader je zranjenje Marka Brězana hišće bóle wosłabiło. Nimo toho běchu třo dalši hrajerjo naraženi. Tuž bě derje, zo mějachu za ćežku wonkownu hru zaso raz rutinjeja Clemensa Eckerta k dispoziciji. Přećiwnik CVJM bě so jako postupnik mjenujcy hižo wo někotre překwapjenki postarał. Njesteji tuž po­darmo w prěnjej połojcy tabulki.

Po dobyću 3:1 pola mustwa Ludwigsfelder FC je FC Energija Choćebuz zhromadnje z koparskimi cyłkami z Fürstenwalde, Babelsberga a Neuruppina do połfinala krajneho pokalneho koła zaćahnyła. Po wulkim wobaranju zastupjerja ze šesteje ligi měješe FCE hakle po 30 mjeńšinach wrotowy wuspěch. Najprjedy bě Paul Gehrmann z hłowu na městnje (28.), krótko po tym přetwori Fabio Viteritti jědnatku (30.). Najebać hru z jednym mužom wjac (Phillip Pollow dósta čerwjenu kartu po hrubym foulu přećiwo Maximilianej Zimmerej w 55. min.) poradźi so Ludwigsfeldej w 61. min. přez Marcela Goede 1:2. Wosom minutow do kónca pak postara so Gabriel Boakye ze spěšnym konterom wo stary předskok a wo zaćah do połfinala. Georg Zielonkowski

Krajny koparski pokal – štwórćfinale

Internatio. Lipsk – Neugersdorf 1:2 (0:0)

Biskopičanske KT II – Auerbach 1:3 (1:0)

Chemija Lipsk – Budissa Budyšin 1:0 (1:0)

wokrjesna liga, stafla I

Großröhrsdorf II – Großharthau 1:1 (0:0)

Huska – Budyšink3:2 (2:1)

Wachau – Wjernarjecy 2:1 (0:0)

Frankenthal – Załom2:3 (2:2)

Malešecy – Horni kraj-Sprjewja II 1:3 (1:1)

Porchow – Połčnica2:3 (1:2)

1. TSV Połčnica 12 39  : 12 31

2. TSV Wachau 12 30  :  4 29

3. Concordia Załom 12 26  : 14 29

4. Traktor Malešecy 12 33  : 17 25

5. ST Porchow 12 20  : 11 22

6. TSV Wjernarjecy 11 24  : 18 20

7. FV Ottendorf-Okrilla 12 21  : 22 18

8. Arnsdorfske KT 12 21  : 21 17

9. Horni kraj-Sprjewja II 11 35  : 22 15

10. SV Großharthau 12 14  : 15 15

11. SC Großröhrsdorf II 12 18  : 14 14

12. SV Frankenthal 11 18  : 24 13

13. Germania Budyšin II 12 15  : 33 7

14. Bretnig-Hauswalde 12 15  : 35 5

15. SV Budissa Budyšink 12 5  : 52 4

16. ST Huska 11 14  : 34 3

wokrjesna klasa, stafla II

Arnsdorf II – Biskopicy II 0:1 (0:0)

Frankenthal II – Drjewnica 1:10 (0:5)

Germania Biskopicy – Wjazońca 1:1 (0:1)

Porchow II – Wjelećin III 5:1 (2:0)

1. HZ Kubšicy/ Bukecy 9 58  : 14 24

2. SG Steinigtwolmsdorf 10 35  : 21 24

3. TSV Wjazońca 10 36  : 20 23

4. Biskopičanske KT II 8 59  :  2 22

5. ST Drjewnica 8 38  :  8 18

6. Bretnig-Haus. II/Ram. II 10 26  :  24 16

7. SSV Germania Biskopicy 9 17  : 20 10

8. Arnsdorfske KT II 10 17  : 22 9

9. ST Bart II 9 13  : 44 6