Z wudaća: póndźela, 19 měrca 2018

Moskwa (dpa/SN). Ruski statny šef Wladimir Putin je wčerawše prezidentske wólby ze 76,66 procentami dobył. To je wólbna komisija po wuličenju nimale wšitkich hłosow dźensa potwjerdźiła. Wólbne wobdźělenje wučinješe 67,47 procentow. Tak wostanje 65lětny Putin, kaž běchu powšitkownje wočakowali, dalše šěsć lět w zastojnstwje. Druhe městno wobsadźi komunist Pawel Grudinin z 11,8 procentami. Za nim slěduje prawicarski populist Wladimir Žirinowski, kiž nažnja 5,7 procentow hłosow. ­Za liberalnu telewizijnu žurnalistku Kseniju Sobčak hłosowaše 1,7 procentow. Štyrjo dalši kandidaća dóstachu hišće mjenje hłosow.

Opoziciji přichileni wólbni wobkedźbowarjo registrowachu něhdźe 3 000 pospytow manipulacije. Tak je dokumentowane, kak někotři wjacore wólbne lisćiki do wólbneho kašćika ćisnu. Z napjatosću wočakowachu tuž wuhódnoćenje wólbow přez Organizaciju za wěstotu a zhromadne dźěło w Europje, kotraž bě 600 wólbnych wobkedźbowarjow zasadźiła.

Christian Krumm: Skónčnje „jězbna dowolnosć z 15“ po cyłej Němskej

Wojerecy (SN/mwe). Jedna z najwjetšich jězbnych šulow Hornjeje Łužicy słuša Wojerowskej wukubłanskej towaršnosći powołanskich šoferow (AGK). Jeje rěčnik Christian Krumm praji, zo chcedźa holcy a hólcy ze wsow wokoło Wojerec kaž tež z Kulowa a Łutow hižo z 15 lětami jězbnu dowolnosć za moped złožić.

Tež Serbja běchu na Lipšćanskich knižnych wikach zastupjeni. Benedikt Dyrlich (POP) tam njedźelu čitaše. W hali 3 na stejnišću D200 je, kaž hižo mnohe lěta, Ludowe nakładnistwo Domowina swoje wudźěłki wustajało. Čitanje serbskich awtorow LND pak so stajnje njeradźi. Je cyle jednorje přewjele požadanjow na terminy a městnosće. Derje tuž, zo je LND namakało městno zwonka wustajenišća, a to pjatk za Lipšćanskim Serbskim blidom, hdźež čitaše Lubina Hajduk-Vejkovićova ze swojeje aktualneje kriminalki „Módre buny“. Spontane čitanja, tež zwonka programa „Lipsk čita“, su stajnje móžne a witane. Přiwšěm by rjenje było, bychmy-li móhli, snano hižo klětu, dožiwić awtora LND z nowostku direktnje na wikach. Bjezdwěla by to mnohim, wosebje serbskim šulskim rjadownjam a tak přichodnym čitarjam serbskeje literatury přidatny powabk był, zaměrnje do Lipska jěć. Milenka Rječcyna

Zymskeho wjedra dla je minjeny kónc tydźenja tež w Budyskim wokrjesu k wjacorym wobchadnym njezbožam dóšło. Sobotu dopołdnja stej wosobowej awće na statnej dróze S 111 njedaloko Worcyna tak derje kaž frontalnje do so zrazyłoj. Dróha bě zawěta, jeje kromje lědma spóznajomnej. Dwě wosobje dyrbjachu zranjenej do chorownje dowjezć. Dróha bě dlěje hač hodźinu zawrjena. Foto: Jens Kaczmarek

Radwor (SN/MkWj). „Tajkich prócowarjow bychmy dźensa nuznje trjebali.“ ­Facit Ludmile Budarjoweje drje měješe něchtóžkuli we hłowje, jako po wopominanskim zarjadowanju składnostnje 50. posmjertnin Michała Nawki minjeny pjatk w Radworju zaso domoj dźěše. Wjace hač połsta zajimcow bě na zarjadowanje na wosadnu žurlu přichwatało, na kotrež běštej Towarstwo Cyrila a Metoda a Maćica Serbska přeprosyłoj.

W krótkopřednoškach zhonichu wopytowarjo wo hoberskim spektrumje skutkowanja Radworčana, kiž bě 16. měrca 1968 zemrěł. Ludmila Budarjowa rozprawješe, kajke problemy mě­ješe „pilny a chrobły serbski prócowar“ z nacionalsocialistami a pozdźišo ze socialistiskej wyšnosću, dokelž nochcyše so statnej liniji podwolić. Tak bě Nawka jedyn z prěnich, kiž dyrbješe 1937 na ćišć nacijow swoju serbsku domiznu wopušćić. Nacionalsocialisća přesadźichu jeho do Kamjenicy.

54 mustwow wubědźowaše so wot soboty wječora hač do njedźelnych rańšich hodźin we Wotrowskim młodźinskim klubje ­na kickerowym turněrje. Prěnje městno wobsadźištaj Peter Kreuz a Richard Franke z Drježdźan, druhe wubědźištaj sej Ali Eldor a Mohamed Amar Ali z Kamjenca a třeće Marko Mět a Tomaš Hejduška z Chrósćic. Foto: Marcel Rjeda

Pjata póstna njedźela je hižo tójšto lět rezerwowana za Slepjanske jutrowne wiki. Najebać lódzymne temperatury je tójšto ludźi do Serbskeho kulturneho centruma (SKC) přišło.

Slepo (JoS/SN). Wopytowarjo 21. serbskich jutrownych wikow w Slepjanskim Serbskim kulturnym centrumje dožiwja prěni raz „jutry w krasnej zymskej krajinje“. Takle witaše nawodnica SKC Sylwija Panošina sobotu hosći, kotřiž běchu na- jebać sněh a wětřik do Slepoho přišli. Zymne wjedro so wězo wotpowědnje wuskutkowaše. Wikowarjo sadu a zeleniny běchu wšitcy wotprajili, nalětnje kwětki a rostliny za zahrodu kónc tydźenja to­horunja žane předawać njemóžachu. ­Wichor je sněženki přez prózdne předawanišća na dworje SKC wěł.

Na twarnišću noweho horta ma so z rjemjeslnikami bórze mjerwić

Pančicy-Kukow (SN/MWj). Za wjace hač 430 000 eurow su čłonojo gmejnskeje ­rady Pančicy-Kukow na swojim zašłym posedźenju twarske nadawki přepodali, zo móhli bywšu pěstowarnju na hort přetwarić. Cyłkownje jědnaće twarskich losow mějachu schwalić. Hač na dwě wu­wzaći dóstachu wšitke tamne nadawki rjemjeslnicy z Pančic-Kukowa a z bliskeje wokoliny.

Składnostnje Mjezynarodneho dnja žonow je Nowowješćanske wjesne towarstwo swoje rentnarki tele dny na zhromadny wulět přeprosyło. W busu přeradźi Manuela Čornakowa sydomnaće wćipnym wobdźělnicam planowany program. Dobreje nalady jědźechmy do Budyskeho Serbskeho muzeja. Tam čakaše na nas hižo rjenje kryta kofejowa tafla ze słódnym tykancom z pjekarnje klóštra Marijineje hwězdy.

Po tym zo běchmy so posylnili, wodźeše nas nawodnica muzeja Christina Boguszowa po aktualnej wosebitej wustajeńcy „Krabat – Muž – Mytos – Marka“ a sposrědkowa nam wjele zajimawostkow. Štóž přehladku hišće widźał njeje, móže to hač do 15. apryla nachwatać. Móžu kóždemu jenož doporučić sej ju wobhladać. Wutrobny dźak hišće raz wšitkim sobudźěłaćerjam Serbskeho muzeja, smy so tam witani a doma čuli.

18lětny znjezbožił

Chelno. Na statnej dróze S 106 mjez Chelnom a Třomi Hwězdami je sobotu wječor 18lětny wodźer BMWja znjezbožił. Na zasněženej dróze zhubi wón kontrolu nad jězdźidłom a so z nim přećisny. Ćežko zranjeneho młodostneho dyrbjachu do chorownje dowjezć.