Z wudaća: srjeda, 11 apryla 2018

Za wjace serbskosće w cyrkwi

Podstupim. Rada za serbske naležnosće Braniborskeje je so wčera w Pod­stu­pimskim krajnym sejmje schadźo­wała. Mjez hosćimi bě dr. Hartmut Leipner, předsyda Spěchowanskeho towarstwa za serbsku rěč w cyrkwi, kaž předsyda rady­ Torsten Mak SN zdźěli. Leipner sej přeješe, zo by so serbskosć w cyrkwjach sylnišo jewiła.

Skruća financnu móc komunow

Drježdźany. Wokrjesam přisłušne komuny maja za lěta 2018 do 2020 stajnje 70 eurow za prěnje tysac wobydlerjow dóstać, maksimalnje 70 000 eurow. To předwidźi naćisk zakonja wo přizwolenju pawšalnych připokazankow k skrućenju wjesneho ruma, kotryž je sakski kabinet wčera schwalił. Hač do lěta 2020 podpěruja financnu móc sakskich komunow dohromady z 90 milionami eurow.

Romojo so sami ličili

Dotalne projekty a wuspěchi předstajili

Budyšin/Drježdźany (SN/JaW). Něšto wjac hač 825 000 eurow zbywa Załožbje za serbski lud z lońšeho etata. To zdźě­lištaj wčera předsydka jeje rady Susann Šenkec a direktor załožby Jan Budar po wuradźowanju załožboweje rady w Drježdźanach na nowinarskej konferency w Bu­dyšinje na naprašowanje našeho wječornika. Kaž Jan Budar rozłoži, su to njepřetrjebane srědki za projekty kaž tež zby­wace per­sonalne kóšty. „Nowe zasady spěchowanja předpisuja, zo maja wšitke institucije 60 procentow njepřetrjebanych personalnych kóštow załožbje wróćić. Loni wostachu městna zdźěla njewobsadźene, wupisanja dźěłowych městnow su z blakami zwrěšćili a dlěšeho schorjenja sobudźěłaćerjow dla smy tohorunja tójšto wuzbytkowali“, praješe direktor.

Rakecy (SN/at). W tuchwilnej požadanskej fazy dźewjateje projektneje namołwy Leaderoweho regiona Hornjołužiska hola a haty (OHTL) stej regionalnemu managementej z widom na turistiske naprawy dwaj wobłukaj wosebje wažnej. Wonej měritej so na to, wukmanić wobstejace turistisce relewantne zarjadnišća a poskitki (B.2), kaž tež na to, zjawnje přistupnu mału turistisku infrastrukturu wutworić a polěpšić (G).

Z mjenowanymaj dźělnymaj naprawomaj chcedźa wuraznje dwurěčnosć spěchować, kaž z po­dłožkow wuchadźa. Zaměr pak tež je, ličbu kwalitatiwnje wysokohódnotnych poskitkow přenocowanja kaž tež dobu pře­bywanja a spokojnosć turistow powjetšić. Zdobom hodźi so historisce hódna twarska substanca zachować a wužiwać, historiske kulturne namrěwstwo tež zjawnje spřistupnić. Hdyž měri so dźělna naprawa B.2 na twarjenja, steji pod dypkom G syć pućow w srjedźišću, zo bychu na přikład turisća krajinu lěpje zaznawali.

Budyšin (SN/bn). Chór Budyšin je na swojej hłownej zhromadźiznje póndźelu předsydku Janinu Krygarjowu w zastojn­stwje wobkrućił. Nowaj čłonaj předsydstwa staj Anne Pawlowski a Robert Lorenc. Sylwija Jancyna a Ilka Hauswald buštej znowa wuzwolenej. Cyłkownje bě sydom kandidatow k wólbam nastupiło.

„Mam za dobre znamjo, zo měješe lětsa wjace spěwarkow a spěwarjow zajim, so w předsydstwje našeho chóra angažować, hač mamy tam městnow“, so Krygarjowa wjeseleše. Hladajo na staw ćělesa wona wuzběhny, zo „je so nam poradźiło nowych, młodych čłonow sej zdobyć a muske hłosy zesylnić, štož bě minjene lěta trochu ćešo. Chemija a harmonija stej wokomiknje jara dobrej.“

Dobyćerjo lětušeho „65. wubědźowanja wo najrjeńše jutrowne jejko“ su jasni. Kotre dźěći a kotrych młodostnych wuznamjenja, chce Spěchowanski kruh za serbsku ludowu kulturu tele dny wozje­wić. Wjace hač 40 dorostowych wuměłcow a wjacore šulske rjadownje je so na wurisanju wobdźěliło.

Budyšin (SN/bn). Lětuše „65. wubědźowanje wo najrjeńše jutrowne jejko“ Spěchowanskeho kruha za serbsku ludowu kulturu je zakónčene. Po dorosćenych, kotrychž wuznamjenichu we wobłuku Budyskich Serbskich jutrownych wikow, je jury – jej přisłušeštej zastupjerka spěchowanskeho kruha Marja Jaworkowa a regionalna rěčnica Domowiny Sonja Hrjehorjowa – wčera wudźěłki dźěći a mło­dostnych wuhódnoćiła. Cyłkownje su so 42 jednotliwcow kaž tež štyri Kulowske rjadowniske cyłki z kolekcijemi dweju jejkow wobdźělili.

Budyšin (SN). Za lětuše 14. čitanske wubědźowanje Rěčneho centruma WITAJ je 23 dźěći přizjewjenych. Pod hesłom „Knihi su zastupny lisćik do raja fantazije“ wubědźuja so šulerjo 3. lětnika serbskich šulow a tajkich, kotrež po koncepće 2plus wuwučuja. Ludowe nakładnistwo Domowina je wospjet partner zamołwiteje za rěčne projekty w RCW Michaele Hrjehorjoweje. Wubědźowanje, kotrež ma zaměr, šulerjow hižo zahe k čitanju pohnuwać a jim bohatosć serbskeje literatury spřistupnić, budźe sobotu zaso w Budyskej Smolerjec kniharni.

W maćernorěčnej skupinje wobdźěli so dźesać šulerjow a 13, kotřiž wuknu serbšćinu jako druhu rěč. Wšitcy čitaja najprjedy před publikumom samowu­zwoleny tekst, kotryž su doma zwučo­wali. Maćernorěčni serbscy šulerjo čitaja na to dalši njeznaty tekst. Jury pod na­wodom wědomostneje sobudźěłaćerki RCW Manuele Smolineje přinoški wuhódnoći a najlěpšich čitarjow mytuje.

Meseberg (dpa/SN). Ze zhromadnym kabinetnym posedźenjom je zwjazkowe knježerstwo dźensa rano w braniborskim Mesebergu z klawsuru pokročowało. Při tym dźěše mjez druhim wo to, podlěšić zasadźenje Zwjazkoweje wobory w Maliju a Somaliji. Wobzamknyć chcychu tež powołanje społnomócnjeneho za bój přećiwo antisemitizmej. Na planje steještej dale hospodarski plan 2018/ 2019 a dieselowa afera.

Pola Telekom stawkowali

Lipsk (dpa/SN). Dźěłarnistwo ver.di je dźensa přistajenych Telekom w Sakskej, Saksko-Anhaltskej a Durinskej k warnowanskim stawkam namołwjało. Stawk potrjechi něhdźe 1 500 sobudźěłaćerjow, kaž dźěłarnistwo zdźěla. Stawkowali su mjez druhim w Lipsku, Kamjenicy, Halle a Zwickauwje. W Lipsku zhromadźichu so wobdźělnicy k demonstraciji po nutřkownym měsće. W sewjerorynsko-westfalskim Euskirchenje su dźensa a jutře tarifowe jednanja.

Zuckerberg zmylki přiznał

Waršawa (dpa/SN). Wosom lět po znje- zboženju prezidentskeho lětadła w ruskim Smolensku su Polacy wčera wopory wopominali. Při katastrofje 10. apryla 2010 běchu wšitcy 96 pasažěrojo žiwjenje přisadźili, mjez nimi tehdyši prezident Lech Kaczyński, dwójnik předsydy knježaceje narodnokonserwatiwneje strony Prawo a sprawnosć Jarosława ­Kaczyńskeho.

Hižo rano zhromadźichu so čłonojo knježerstwa a wobydlerjo na wopominanski apel před Waršawskim prezidentskim palastom, při čimž mjena wšitkich woporow předčitachu. Swjatočnosće trajachu hač do wječora. Jedyn z wjerškow bě poswjećenje noweho dwělomneho pomnika za wopory wosrjedź města. Opozicionelne Waršawske měšćanske zarjadnistwo bě so podarmo nastajenju pomnika – dopominaceho na lětadłowe schodźenki kaž tež narowny kamjeń – na Naměsće Piłsudskeho wobarało.

Pólska je hač do dźensnišeho w pra­šenju přičiny njezboža pačena. Knježacy a mnozy přiwisnicy su přeswědčeni, zo bě njezbožo atentat. Oficialne pře­pytowanja pak wujewichu, zo běchu čłowjeske zaprajenje a techniske njedostatki wina.