Z wudaća: wutora, 22 meje 2018

Kulow (AK/SN). Saněrowanje stareho města je Kulow w minjenych 25 lětach chětro změniło a městu nowe wobličo spožčiło. Tole podšmórny měšćanosta Markus Posch (CDU) na zašłym posedźenju měšćanskeje rady. Jeje čłonojo tam wobzamknychu, wot lěta 1993 płaćiwe saněrowanske wustawki za 20 hektarow wulki areal z radnicu, šulskim naměstom a šulu jako ćežišćemi zběhnyć.

Ze sakskeho krajneho saněrowanskeho programa měješe Kulow wot lěta 1993 nimale 790 000 eurow k dispoziciji. Z měšćanskotwarskeho programa mó­žachu dźesać milionow eurow inwestować, rozłoži Dieter Lamm, zamołwity sobu­dźěłaćer Drježdźanskeje firmy za měšćanske wuwiće Kulowa. Nimo njeličomnych twarskich projektow města su tež priwatni inwestorojo spěchowanske srědki dóstali. Mjez druhim spěchowachu spotorhanje 35 priwatnych domow, kotrež njehodźachu so hižo ponowić. Za sa­něrowanje priwatnych twarjenjow ­přewostaji Sakska dwaj milionaj eurow. Přerěznje dóstachu wobsedźerjo 20 000 do 25 000 eurow. Najwjace spěchowanja wudachu ze 102 000 eurami za priwatny dom na torhošću. Wšitke naprawy su nětko wotzamknjene.

Wojerecy. Za wodowu wěžu při Wojerowskim dwórnišću pytaja noweho wobsedźerja. 4. junija chcedźa ju na awkciji w Drježdźanach přesadźować. Minimalna płaćizna, kotruž je Sakska ležownostna awkcija AG postajiła, wučinja 15 000 eurow. Wodowa wěža pochadźa z lěta 1907 a je kulturny pomnik. Přesadźo­warjo wuraznje na to skedźbnjeja, zo je trjeba wěžu wobšěrnje ponowić. To bě hižo widźeć, jako bě wona w lěće 2011 posledni raz składnostnje wuměłstwoweje akcije zjawnje přistupna.

Rozmołwjeja so wo wuchodźe

Budyšin. We wobłuku tuchwilneje fotowustajeńcy wo žiwjenju w NDR wot­mě­je so w Budyskim wopomnišću za­jutři­šim, štwórtk, w 19 hodź. podijowa rozmołwa. Přitomnaj budźetaj fotograf Ha­rald­ ­Hauswald, kiž je w 1980tych lětach žiwjenje we wuchodnym Berlinje foto­grafował, a Stefan Wolle. Wón je teksty­ k wustajenym fotam spisał.

Do wobchoda zajěł

Wulka Dubrawa. Do murje kuchinskeho studija we Wulkej Dubrawje je njedźelu dopołdnja 33lětny ze swojim awtom zrazył. Najskerje slepjaceho słónca dla bě wón w kružnym wobchadźe kontrolu nad BMWjom zhubił. Při zražce so wukładne wokno wobchoda rozbi. Škoda wučinja něhdźe 10 000 eurow.

SC Großröhrsdorf

– Sokoł Ralbicy/Hórki 2:0 (1:0)

Zestawa hosći: Ch. Gloxyn – Rawš, Zynda, Šewc, K. Matka, M. Matka, D. Gloxyn, Kurjat, Domaška, Jakubaš (55. Krohmer), Bjeńš

Jónu so kóžda serija torhnje. Tak tež za koparjow Sokoła Ralbicy/Hórki, kotřiž běchu we wokrjesnym pokalu 15 hrow pospochi bjez poražki. Pola načolnika wo­krjesneje wyšeje ligi w Großröhrsdorf­je wisachu płody přewysoko. Hižo před­znamjenja na hru njeběchu optimalne. Wjacori Sokoljo pobrachowachu, a zestawa so nimale sama wutwori. Z kompaktneje defensiwy chcychu hosćo startować a strašnje nadběhi po dobytym bulu natwarjeć. To wšak so jim njeporadźi, dokelž Großröhrsdorf hižo zahe nawjedowaše. W 7. min. bě so do Ralbičanskeje šěsnatki kombinował, a rutinjej Fabian Senf třěli nawjedowanje. Hakle poněčim namakachu Sokoljo hrajnu nitku a Pětrej Domašce skićeše so šansa na wurunanje. Wón pak zwrěšći na wrotarju.

38. koparski turněr wjesnych mustwow swjatki póndźelu w Pěskecach je hosćićelski cyłk po třělenju jědnatkow přećiwo Serbskopazličanam 3:2 dobył. Rozsudnu jědnatku přetwori turněrowy nawoda Fabian Korjeńk (klečo druhi wotlěwa). Hru wo třeće městno dobychu Róžeńčenjo 1:0 přećiwo Njebjelčanam. Wjace wo turněrje w jutřišim wudaću SN. Foto: Kilian Hrjehor

Awtor dźensa Ludwig Zahrodnik

Wo postupje resp. ze­stupje je mjeztym w nimale wšitkich koparskich ligach a klasach rozsudźene. Wjeselo mištrow a postupnikow bě wšudźe wulke, nic jenož w Mnichowje, ale na při­kład tež w Nürnbergu, Magdeburgu a Biskopicach. Někotre mustwa su so­ takrjec w poslednjej mjeńšinje před zestupom wuchowali kaž Dynamo Drježdźany abo Budissa Budyšin. Zestupnicy pak běchu­ husto hłuboko zraženi a zrudni. W prěnjej zwjazkowej lize je to tónraz na tradicije bohatej klubaj trjechiło: 1. FC Köln a Hamburgski SV.

Haj, kopańca je dźensa brutalny gšeft. Jenož, štóž wot swojeho ćěła wobstajnje maksimalny wukon wužaduje, ma šansu na dlěšodobny wuspěch. Njemyslu tu jeno­ž na nadarjenych hrajerjow, kotřiž su přez­ ćežke zranjenja, často přez bru­talne foule zawinowane, w swojej karjerje wohroženi. Myslu pak runje tak na pady, hdźež su so wulkotni koparjo ćělneho přenapinanja dla na trawniku zwjezli a ze­mrěli.

Wólnočasni wolejbulisća ST 1922 Ra­dworja su dźewjaty turněr wo pokal spěchowanskeho towarstwa Serbskeho gymnazija Budyšin (SGB) w sportowni tamnišeho Serbskeho šulskeho a zetkawanskeho centruma mjez pjeć startowacymi cyłkami dobyli.

Předposlednja stacija turněrow serije „top-šěsć“ při wysokim saku skónči so minjenu srjedu w Budyšinje z njewo­čakowanym wuspěchom najmłódšeho mu­­stwa. Wólnočasni wolejbulisća ST 1922 Radwor startowachu do wubědźowanja wo pokal spěchowanskeho towarstwa Serbskeho gymnazija z třomi do­byćemi a podležachu w poslednjej hrě z 14:19 pozdźišemu druhemu, abiturnemu lětnikej 1996. Tući dobychu tež tři partije, dyrbjachu pak so ze snadnej poražku 19:20 wučerjam SGB kłonić. Tak bě trjeba wšitke wuhrate dypki za kónčne zaměstnjenje wuličić. Tónraz juskachu Radworčenjo, dokelž běchu 19 plusdypkow wjac.

Kopańca, NOFV-wyša liga

Sandersdorf – Intern. Lipsk 2:0 (1:0)

SCHOTT Jena – Halle3:2 (3:1)

Rudolstadt – Biskopicy 1:3 (0:1)

Carl Zeiss Jena II – Bernburg 3:2 (3:0)

Kśišow – Eilenburg3:2 (1:2)

Barleben – Plauen4:4 (3:1)

1. Biskopičanske KT 28 66 : 14 70

2. FC International Lipsk 28 57 : 21 58

3. FC Carl Zeiss Jena II 28 60 : 34 56

4. VFC Plauen 28 45 : 51 49

5. FC Eilenburg 28 47 : 31 46

6. TV Askania Bernburg 28 57 : 35 44

7. FC Einheit Rudolstadt 28 51 : 39 43

8. VfL 96 Halle 28 26 : 35 36

9. VfB 1921 Kśišow 28 52 : 60 35

10. BSG Wismut Gera 28 38 : 47 34

11. SG Union Sandersdorf 28 48 : 48 33

12. SV SCHOTT Jena 28 29 : 53 33

13. 1. FC Lok Stendal 27 28 : 48 29

14. FSV Barleben 28 31 : 52 29

15. Jednota Kamjenc 28 21 : 49 19

16. SV Merseburg 99 27 28 : 67 12

Mnichow (B/SN). Kardinal Mnichowa Reinhard Marx wobzamknjenje bayerskeho kabineta nastupajo připrawjenje křižow w słužbnych twarjenjach swobodneho stata kritizuje. Wumjetuje ministerskemu prezidentej Markusej Söderej (CSU) „pačenje, njeměr, konfrontaciju“, kotrež je wón zbudźił. Hdyž wobhladu­jemy křiž jenož jako kulturny symbol, njejsmy naležnosć zrozumili“, praji předsyda biskopskeje konferency nowinje Süddeutsche Zeitung. „Statej pak njepři­steji wujasnić, što křiž woznamjenja.“

Nadźijeja so pomocy Vatikana