Budyšin. We wobłuku wosebiteje wustajeńcy w Muzeju Budyšin wo tudyšich klempnarjach a instalaterach wotměje so jutře, štwórtk, w 17 hodź. wodźenje po energijowym centrumje na Thomasa Müntzerowej. Zajimcam předstaja tam techniske připrawy za produkciju miliny a ćopłoty a poskića jim móžnosć, zalězć na 35 metrow wysoku energijowu wěžu. Přizjewjenje trěbne njeje, zastup je darmotny. Zajimcy zetkaja so při zachodźe energijoweho centruma.
Wotewru wustajeńcu
Wojerecy. K 750. róčnicy Wojerec wotewru w tamnišej starej radnicy pjatk, 25. meje, w 13 hodź. wosebitu wustajeńcu z pohladnicami wo nowym měsće wot lěta 1957 do dźensnišeho. Přehladka budźe hač do kónca awgusta přistupna.
Sokoł Ralbicy/Hórki
– Módro-běli Kulow 1:2 (0:1)
Zestawa domjacych: Mjetaš-Wowčer – Statnik, Lulak, Brückner, M. Žur, Jakubaš, Šołta, Čornak (55. Čórlich), Pilc (65. Zynda), S. Žur (25. Serbin), Hrjehor
Po snadnej poražce do toho kopachu stari knježa Sokoła Ralbicy/Hórki znowa přećiwo Kulowskej starej gardźe, a to w połfinalu wokrjesneho pokala.
Hižo před lětom běštej mjenowanej cyłkaj na samsnym městnje přećiwo sebi hrałoj, a Sokoljo podležachu z 0:1. Lětsa chcychu so woni stopnjować a prěni raz do kónčneje hry zaćahnyć. Po spočatnych problemach so jim tež poradźi, hru derje natwarić a hosći pod ćišć stajić. W 17. min. pak běchu hižo w zastatku. Spěšnje wuwjedźechu Kulowčenjo wólny kop a flanka docpě Thomasa Herolda, kiž bul do dołheho kuta sokołskich wrotow zhłójčkowa. Prěni pospyt to hosći, kiž hnydom sedźeše. Po rjanej kombinaciji so Měrćinej Hrjehorjej z nahłeho kuta wurunanje njeporadźi (27.).
ST Babelsberg 03
– FC Energija Choćebuz 0:1 (0:0)
Zestawa hosći: Spahić – Starcew, Stein, Matuwila, Schlüter, Gehrmann, Zickert, Siebeck (90. Viteritti), Marcelo, Geisler (68. Weidlich), Scheidhauer (77. Mamba)
Prěnju z třoch kónčnych hrow tydźenja je FC Energija Choćebuz snadnje, za to pak zasłužbnje dobyła. Z 1:0 přesadźichu so koparjo FCE pola stafloweho konkurenta Babelsberg 03. Hosćo hru přez dołhe fazy dominowachu, a to ze startowym mustwom. Trenar Claus-Dieter Wollitz wzda so srjedźopólnych motorow Fabija Viterittija a Maximiliana Zimmera, tež třělc złotych wrotow Kevin Weidlich bu hakle we 68. min. na hrajnišćo pósłany. Přeměnjena formacija pak pokaza, zo ma FCE wjele dobrych a jara dobrych akterow w swojich rjadach.
Po póndźelnej putniskej Božej mši w Róžeńće je Fabian Korjeńk ze starosćiwym hłosom a chutnym mjezwočom hišće sudnikow za 38. swjatkowny koparski turněr wjesnych mustwow pytał, póndźelu wječor pak radowaše so Pěskečan z pozběhnjenej hłowu a wjesołym mjezwočom z wjesnjanami nad dobyćom a dosahacej ličbu refereejow. W finalu přesadźi so domjacy cyłk 3:2 po třělenju jědnatkow přećiwo Serbskopazličanam, kotřiž běchu sej loni pokal zawěsćili. Rozsudnu jědnatku přetwori turněrowy nawoda Fabian Korjeńk sam.
Kaž hižo wjacore lěta do toho bě znowa wosom wjesnych mustwow w Pěskečanskim lěsnym stadionje k „Dźiwjej rancy“, kaž ju stadionowy rěčnik Jurij Matka-senior rady mjenuje, nastupiło. Zarjadowar a wuhotowar bě wospjet wjesne sportowe towarstwo ze swojim předsydu Křesćanom Mjechelu. Hižo w skupinskej fazy dyrbjachu sej cyłki wulku prócu dawać, wšako smědźeštej jenož staflowej dobyćerjej do finala zaćahnyć. To poradźi so zastupnistwomaj z Pěskec a Serbskich Pazlic.
Zeleno-běli Sepicy
– SJ Chrósćicy II 2:7 (0:5)
Zestawa hosći: Matješk – A. Dórnik, Dehn, Mark, F. Dórnik, Šołta (78. Pjetaš), Bětnar, Domaška, Wowčer (72. Mohaupt), Liznar (64. Donat), Šmit
SJ Chrósćicy II
– SV Haselbachtal 6:0 (2:0)
Zestawa domjacych: Matješk – M. Donat, Mark, Bětnar, Dehn, L. Zahrodnik (80. J. Donat), Henčl, M. Zahrodnik, Wowčer (70. Domaška), Liznar (63. Šmit), Bogusz
Po dobyću přećiwo Sepicam wočakowaše rezerwa Chróšćanskeje SJ pjatk do swjatkow zastupnistwo z Haselbachtala. Poprawom by hra hižo w februaru być dyrbjała, tola to njebě trawnik w Chrósćicach hišće kmany dosć. Zapadołužiski koparski zwjazk pak nachwatanski termin tróšku zaspa, a tuž ju nětko hakle krótko do kónca sezony zahwizdachu.