Z wudaća: póndźela, 11 junija 2018
póndźela, 11 junija 2018 14:00

Druhi raz w ministerstwje

Berlin/Stuttgart (dpa/SN). W padźe wumjetowanja, zo je koncern Daimler wotpłunowe hódnoty awtow manipulował, bě šef předewzaća Dieter Zetsche dźensa druhi raz do zwjazkoweho wobchadneho ministerstwa přeprošeny. Daimler je po měnjenju zwjazkoweho zarjada za jězdźidła manipulowane programy do transportera typa Mercedes Vito zatwarił. Dwaj tydźenjej měješe Zetsche chwile konkretne ličby wuslědźić. Dźensa dyrbješe wón wuslědki předstajić.

Mnohe prašenja wotewrjene

Mainz (dpa/SN). Surowa smjerć 14lětneje Susanny zaběra přepytowarjow tež po přesłyšowanju podhladneho mordarja. Po šěsć hodźinach 20lětny Irakčan Ali B. wčera přizna, zo bě 14lětnu morił, prěješe pak, zo bě ju wumocował. Tak su mnohe prašenja hišće wotewrjene. Po zdźělence policije je motiw njeskutka dale njejasny. Po wuwjedźenjach Irakčana je holca padnyła a so w mjezwoču zraniła. Dokelž so boješe, zo wona policiju woła, je ju morił. Skućićel sedźi nětko w jastwje w Frankfurće nad Mohanom.

Chcedźa truty zasadźić

wozjewjene w: Politika
póndźela, 11 junija 2018 14:00

Dźeń a nóc połnej kultury

Ludowe nakładnistwo Domowina je sobo­tu na dźeń wotewrjenych duri přeprosyło. Ćežišćo bě 60. róčnica załoženja LND 1958. Samsny wječor wobdźěli so na Dołhej nocy kultury w Budyšinje.

wozjewjene w: Kultura
póndźela, 11 junija 2018 14:00

Faworit so jasnje přesadźił

ST 1922 Radwor – Sokoł Ralbicy/Hórki 2:5 (2:2)

Zestawa domjacych: Kral – Omran, Šěrak, Henka, Zähr (68. Handrik), Wjeńka, Nuk, Zimmermann, Bauer (57. Wróbl), Schulze, Kurjat (85. Buša)

Zestawa hosći: Ch. Gloxyn – Rawš, Zynda, Šewc, K. Matka, M. Matka, Janca, Bjeńš, Młynk (86. Korjeńk), Kurjat, Domaška (86. Kobalc)

Wonkowne wuměnjenja za serbski kopar­ski derby we wokrjesnej wyšej lize běchu optimalne. Něhdźe 300 přihla­­dowarjow bě do Radworja přichwatało. Wobě­ mustwje měještej swoju klasu hižo za­wěsćenu, tuž móžeštej z wotewrjenym wizěrom hrać.

wozjewjene w: Sport
Zapósłanc Sakskeho krajneho sejma Marko Šiman (CDU) je minjeny pjatk zhromadnje ze zamołwitymi Budyskeho wokrjesa a Drježdźanskeje krajneje direkcije wuradźował, kak hodźało so zapławjenjam přichodnje zadźěwać. Při starowni w Budyskim ­Židowje rozłoži jemu zamołwita měšćanostka za twarske naležnosće Juliane Naumann (1. wotlěwa) wotpowědne planowanja sprjewineho města. Wosebje Jordanowa rěčka w Židowje načinja při wulkej wodźe hoberske ćeže. Foto: SN/Maćij Bulank

wozjewjene w: Politika

Ratarjo měli so ze zaměrnymi strategijemi za škit rostlin, skotu a wobswěta na změnu klimy nastajić. To podšmórny dr. Walter Schmidt, nawoda referata plahowanje rostlin Sakskeho krajneho zarjada za wobswět, ratarstwo a geologiju minjeny štwórtk na pólnym dnju w Pomorcach.

Pomorcy (AK/SN). Mnozy ratarjo z Budyskeho wokrjesa su so w Pomorcach wobhonili a sej nazhonjenja wuměnjeli. Fachowe informacije pólneho dnja su na hłowne kultury, kaž su to ječmjeń, pšeńca, rožka, rěpik a kukurica, runje tak kaž na hroch, buny a len wusměrjene.

W Pomorčanskim pospytowanišću plahuja, pruwuja, dokumentuja a přirunuja nowe družiny. Čuja so kaž załožba za testowanje tworow. „Pruwujemy družiny jara dokładnje. Přinjesu-li wone tři lěta dołho nadpřerězne wunoški, móžemy je oficialnje poručić“, rozłoži nawoda zarjadnišća Pierre Seiboldt. Nazymski ječmjeń, nazymsku pšeńcu, triticale a nalětni ječmjeń pruwuja zaměrnje na proteiny, wunošnosć, rezistencu pře chorosće a na spřećiwjenjakmanu móc.

wozjewjene w: Hospodarstwo
póndźela, 11 junija 2018 14:00

Pomjenuje kardinalow

Vatikan (B/SN). Bamž Franciskus je pomjenowanje 14 nowych kardinalow připowědźił. Woni maja wotbłyšćować „uniwersalitu cyrkwje“, rjekny swjaty wótc. Mjez druhim dóstanjetaj patriarch Louis Raphael I. Sako z Bagdada a arcybiskop Joseph Coutts z Pakistana 29. junija purpur kardinala. Kandidat z němskorěčneho ruma tónkróć žadyn pódla njeje.

Za mjezynabožinsku wučbu

Erfurt (B/SN). Durinska krajna frakcija CDU je mjezynabožinsku wučbu zaki­towała. Předmjet ewangelskim kaž tež katolskim šulerjam zhromadnje poda­wać móže pedagogisce płódne być, rje­kny nabožinsko-politiska rěčnica frakcije Gudrun Holbe. To pak njesměło k tomu wjesć, zo so stat ze swojeje zamołwitosće wuwinje, poskićeć na konfesiju wjazanu wučbu nabožiny.

Sadźby Hartza IV hinak wobličić

wozjewjene w: Cyrkej a swět
póndźela, 11 junija 2018 14:00

Merkel hrozy Trumpej

Berlin (dpa/SN). Zwjazkowa kanclerka Angela Merkel (CDU) je prezidentej USA Donaldej Trumpej po toho eklaće w zwisku z wjerškowym zetkanjom G 7 z raznej reakciju na jeho swojowólnosće hrozyła. „Njedamy so stajnje zaso zjebać. Potom tež jednamy“, rjekny wona wčera wječor w telewiziji ARD. Kanclerka reagowaše tak na nowe chłostanske cła USA na wukrajny wocl a aluminij. Dyrbjał-li Trump tež němskim awtam chłostanske cła napołožić, připowědźi Merkel razne europske přećiwne naprawy.

Trump postara so wčera wo dotal njesłyšany eklat, jako bě zhromadnje wobzamknjenu deklaraciju wjerška G 7 z informaciju na internetnym portalu Twitter swojowólnje wupowědźił. „To wostrózbja a zdobom deprimuje“, rjekny Merkel. Zwjazkowe knježerstwo najebać to na deklaraciji wobstawa.

wozjewjene w: Politika
póndźela, 11 junija 2018 14:00

Cebit přetworjena

Hannover (dpa/SN). Mjezynarodnu kompjuterowu přehladku CeBIT su dźensa w Hannoveru dospołnje přetworjenu oficialnje zahajili. Tak stej digitalizacija wokoło kumštneje inteligency a awtonomne jězdźenje bóle zapřijatej. Tež ludźo, kotřiž so priwatnje za digitalnu techniku zajimuja, móža lětsa wjace poskitkow wužiwać. Jutře je wopyt zwjazkoweho hospodarskeho ministra Petera Altmaiera (CDU) předwidźany. Dohromady liča organizatorojo z hač do 2 800 wustajerjemi ze 70 krajow. Tajka transformacija wikow je po cyłym swěće jónkrótna. Prěni raz přewjedu je hakle w zažnym lěću, hdźež wiki, konferencu a wutworjenje syćow naraz prezentuja.

wozjewjene w: Politika
póndźela, 11 junija 2018 14:00

Matej stronski zjězd za wuspěšny

Berlin (dpa/SN). Zastupowaca předsydka zwjazkoweje frakcije Lěwicy Sevim Dagdelen je turbulentny stronski zjězd kónc tydźenja w Lipsku jako wuspěch hódnoćiła. „Wšitke pospyty, Sahru Wagen­knecht izolować, njeběchu wuspěšne“, wona zwurazni. Na stronskim zjězdźe bě so konflikt nawodnistwa strony přiwótřił. Wagenknecht wupraji so w Lipsku znowa přećiwo njewobmjezowanemu připućowanju ćěkancow, štož wuwabi wulku diskusiju. Předsydstwo frakcije a strony připowědźatej nětko zhromadny pospyt wujednanja. Tak je mjez druhim zhromadna klawsura planowana. „Zo chce so předsydstwo strony z temu migracija a ćěkańca wěcownje rozestajeć, jara witam“, Dagdelen potwjerdźi. Štóž pak dale přećiwo najpopularnišej politikarce Lěwicy wustupuje, tón drje na bazy dowěru zhubi.

Frakciska předsydka Lěwicy Sahra Wagenknecht sama ma kontrowersny stronski zjězd tohorunja za wuspěch. „Wothłós, kotryž sym na swoju narěč dóstała, pokazuje, zo njejsym w stronje scyła izolowana“, wona wčera wječor wuzběhny.

wozjewjene w: Politika
póndźela, 11 junija 2018 14:00

Šiman za lěpše škitne naprawy

Spěšne rozrisanja hladajo na zapławjenja trěbne

Budyšin (SN/MkWj). Njewjedro kónc meje ze zapławjenjemi je serbskeho zapósłanca CDU w Sakskim krajnym semje pohnuło jednać. Minjeny pjatk je wón z teje přičiny „termin na městnje“organizował a zastupnikow Drježdźanskeje krajneje direkcije, krajnoradneho zarjada, Budyskeho měšćanskeho zarjadnistwa a potrjechenych wjesnych předste­jićerjow přeprosył.

Bjezposrědnje po njewjedrje bě sej Marko Šiman zawostajene škody w Budyšinje, Słonej Boršći a Delnim Wunjowje wobhladał. „Hižo wospjet dožiwjenu situaciju po zliwkach njemóža ani wobydlerjo ani ja akceptować“ w zdźělence Šimana k planowanemu zetkanju rěka. Zešli su so minjeny pjatk mjez druhim při Jordanowej rěčce njedaloko hladarnje na Budyskim Židowje. Jordanowa rěčka, kotruž ludźo na Židowje jenož „rěčka“ mjenuja, bě po zliwkach přeběžała a tež hladarnju zdźěla zapławiła. Šiman chcyše wot přichwatanych zamołwitych wědźeć, što chcedźa za lěpši škit ludźi činić a kak daloko planowanja su.

wozjewjene w: Politika

nawěšk

nowostki LND