Z wudaća: srjeda, 15 awgusta 2018

Drježdźany/Budyšin (SN/at). We wobłuku pjateho wudźělenja srědkow ze zamóženja stron a masowych organizacijow NDR je Sakska 62 milionow eurow dó­stała. Kabinet tuž wčera w Drježdźanach wobzamkny, kotre projekty z tohole hornca chce spěchować.

Na lisćinje zapisanej stej mjez druhim saněrowanje a přetwar twarjenja Serbskeho ludoweho ansambla, hdźež je baletna žurla zaměstnjena. Kaž nawodnica ležownostneho zarjada Załožby za serbski lud Serafina Pašcyna našemu wje­čornikej wobkrući, chcedźa z tymle krokom wobnowjenje kompleksa SLA dale wjesć.

Namjet, winowatostnu słužbu zawjesć, zbudźa rozdźělne měnjenja

Budyšin/Smječkecy (SN/JaW). Namjet, zawjesć winowatostnu słužbu podobnje wojerskej winowatosći, maja wjacori fachowcy na polu socialnistwa a wjacori serbscy politikarjo za dobry nastork. Je pak­ tež napřećiwnych měnjenjow.

Zapósłancaj Sakskeho krajneho sejma Alojs Mikławšk a Marko Šiman (wobaj CDU) namjet witataj a rjeknyštaj to tež minjeny štwórtk na kromje swojeje kolesowarskeje tury po wólbnymaj wokrjesomaj. „Młodostni zběraja nazhonjenja w hinašich wobłukach žiwjenja“, měni Alojs Mikławšk. Marko Šiman ma za najwjetši brach, zo njemóže młoda generacija mjez šulu, wukubłanjom a pozdźišim žiwjenjom něšto dospołnje hinaše zeznać. „Ciwilna słužba bě mnohim šansa, hinak na žiwjenje zhladować. A wójsko je mnohe charaktery skrućiło. To ­pobrachuje. Wo wojerstwje móžemy diskutować, kaž chcemy, ciwilna słužba je njeparujomna“, Šiman podšmórny.

W pěstowarnjach čakaše tele dny překwapjenka na dźěći. W jich faškach abo w skupinskej stwě ležeše za kóžde z nich zešiwk „Lutki“. Sobudźěłaćerka RCW Weronika Butendeichowa bě jón wosobinsce do dźěćacych dnjowych přebywanišćow, kotrež maja Witaj-skupiny, dowjezła. Serbske šulske towarstwo swój Staršiski list na podobne wašnje rozšěrja. Sobudźěłaćerki SŠT Marlis Młynkowa, Monika Süßowa a Marja Jaworkowa jón tohorunja wjackróć wob lěto do kubłanišćow woža. Posoljo njejsu při tym jenož witany listonoš. Jim skići so zdobom składnosć, nowosće zhonić, z kubłarkami/kubłarjemi wo starosćach rěčeć a ideje za dalše wudaća rodźić. Derje, zo stej brošurce serbsce a němsce, staršiski list tež delnjoserbsce, spisanej a zo jej darmotnje rozdawaja. Tak móža wšitcy wšitko čitać a zrozumić, tež starši, kotřiž serbšćinu njewobknježa. Mam wobaj zešiwkaj za aktiwny kubłanski srědk. Milenka Rječcyna

Praha (ČŽ/K). W Čěskej republice zasydla so dale a wjac ruskich ludźi. Přebywaše-li lěta 2006 něhdźe 23 300 Rusow a Rusowkow w kraju, wučinješe jich ličba lětsa kónc junija 37 303.

Po statistice čěskeho nutřkowneho ministerstwa tworja Rusojo w susodnym kraju štwórtu najsylnišu skupinu wukrajnikow. Spomnjena statistika zdobom wupokazuje, zo přebywaja třo z dźesać Rusow w Čěskej dźěła abo předewzaćelenja dla. W lěće 2016 je 10 990 z nich dźěło měło – 8 200 w najwšelakorišich powo­łanjach, 2 700 předewzaćelsce. Pjećina ruskich staćanow je swójby dla do Čech ćahnyła, dźesaćina z humanitarnych a dru­hich přičin. Přibližnje 20 procentow z nich studuje. Loni su uniwersity a wysoke šule 5 906 ruskich studentow měli. 353 z nich je studij samych płaćiło. Poprawom pak ruscy studenća, kotřiž zdźěłowanje w čěšćinje absolwuja, za studij na zjawnych kubłanišćach runja čěskim komilitonam njetrjebaja ničo płaćić.

Po měrcowskim zwěsćowanju wo­prašowarnje CVVN słušeja wšak Rusojo k tym narodnosćam, kotrež Češa tak ­derje čuć njemóža. Třećinje z nich su ­Rusojo njesympatiscy, jeničce štwórćinje sympatiscy.

Ličba čitarjow ćišćanych wudaćow němskorěčnych dźenikow je so porno lětu 2017 wo 1,3 miliony ­pomjeńšiła. W Němskej wuchadźace mjeńšinowe dźeniki njeběchu do přepytowanja ­zapřijate.

Frankfurt nad Mohanom/Budyšin (SN/at). Štóž wuwiće nowinskich wikow w Europje a USA sćěhuje, toho to njepřekwapja: Ćišćane nowiny w Němskej su w minjenych dwanaće měsacach wjace čitarjow zhubili hač lěto do toho. Z wčera w Frankfurće nad Mohanom wozjewjeneje medijoweje analyzy wuchadźa, zo po cyłym Zwjazku 39,3 miliony ludźi dźenik čitaja – 1,3 miliony mjenje hač hišće před lětom. Loni w juliju bě medijowa analyza spad wo 600 000 či­tarjow w běhu lěta wunjesła. Wužiwanje e-paperow a dalšich online-poskitkow njebě wobstatk projekta.

Aktualnje docpěwaja dźeniki w našim kraju 55,8 procentow němskorěčneho wobydlerstwa w starobje wot 14 lět. Lěta 2017 bě jich hišće 57,9 procentow. Z wotstawkom najbóle čitana nowina wostawa Bild. Bulwarne łopjeno čita wšědnje 9,42 milionow ludźi.

Žonopowe tydźenje wotměwaja so wot wčerawšeho w Budyšinje 13. raz. Hač do 9. septembra poskićeja gastronomojo w swojich hosćencach najwšelakoriše kulinariske wosebitosće, za kotrež na někajke wašnje Budyski žonop wužiwaja. Tež „Wjelbik“ a „Culinarium“ stej wobdźělenej. Zahajili su žonopowe tydźenje tu w žonopowym wobchodźe, hdźež Daniela Schletze wopytowarjow wo najwšelakorišich słodach žonopa poradźuje. Foto: SN/Maćij Bulank

Z połnej paru diskutuja w Biskopicach tuchwilu wo přichodźe tamnišeho kulturneho domu. Při wšěch rozdźělnych měnjenjach drje je jasne, zo su za njón dobre ideje trěbne.

Biskopicy (UM/SN). Štó paruje Biskopičanski kulturny dom? Za čas NDR kaž tež w lětach po přewróće bě wón jedyn z najwoblubowanišich kulturnych domow Hornjeje Łužicy. Mjeztym impozantny twar hižo połdra lěta njewužiwaja. Wonkowne sćěny su pomórane, njerodź steji hač wyše kolen, w rumnosćach w přizemju su wandalojo slědy zawostajili.

Hamorska gmejnska rada zrěčenje za turistisku atrakciju wobzamknyła

Hamor (AK/SN). Wot spočatka sezony 1. apryla 2019 ma na Bjerwałdskim jězoru pasažěrska łódź jězdźić. K tomule zaměrej wuzna so zawčerawšim Hamorska gmejnska rada. Jednohłósnje wobzamknychu radźićeljo zrěčenje wo wobhospodarjenju tajkeje łódźe mjez Hamorskej gmejnu a Dožiwjenskim łódźnistwom Hornja Łužica tzwr. „Zakład a přikład za to je zrěčenje wo pasažěrskej łódźi na Lejnjanskim jězoru, wotzamknjene mjez łódźnistwom Marianny Löwa a sakskim zaměrowym zwjazkom Łužiska jězorina.“ To rozłoži radźićelam Roman Krawc, projektowy koordinator Hamorskeje gmejny za Bjerwałdski jězor. Lětsa w nowembru chcedźa łódź ze Sauerlanda do Hornjeje Łužicy přiwjezć.

Budyšin (SN/MWj). Hdyž slowki zrawja, zynča čorno-žołte drapy zaso wokoło tykanca, grilowaneho mjasa a limonady. Wosy nětko w přiběracej měrje za picu pytaja, předewšěm słódkej. Pobrachowaca chłódnota w juniju a žane powodźenja skićachu wosam lětsa optimalne ­wuměnjenja so wuwiwać. Jich ludy docpěwaja w awgusće a septembru maksimalnu wulkosć. „Strašne za čłowjeka poprawom jenož je, hdyž je blisko wosaceho hnězda abo w zalětnej čarje“, warnuje Uwe Vogt z Budyskeje wotnožki chorobneje kasy KKH. „Potom čuja so wosy wohrožene, reaguja agresiwnje a časćišo kałnu.“

Ochranow. Ze swojim najnowšim rjadom koncertow „Mišterske twórby chóroweje hudźby“ budźe Serbski ludowy ansambl zajutřišim, pjatk, w Ochranowje a přichodnu njedźelu w Lutorjecach (Leutersdorf) z hosćom. Pod nawodom chóroweho direktora Andreasa Pabsta jewja so w koncertomaj kruchi serbskich, němskich a mjezynarodnych komponistow baroka, romantiki kaž tež moderny. Koncert w Ochranowskej cyrkwi započnje so pjatk w 19 hodź., tón w Lutorječanskej katolskej cyrkwi njedźelu w 16 hodź.

Předstaja alternatiwnu šulu

Běła Woda. Spočatk šulskeho lěta 2019/2020 chcedźa w Běłej Wodźe swobodnu alternatiwnu zakładnu šulu wu­tworić. Projekt čłonojo załoženskeje iniciatiwy přichodny tydźeń trójce předstaja, a to wutoru w 19 hodź., srjedu w 17 hodź. a štwórtk w 15.30 hodź., stajnje w rumnosćach Běłowodźanskeje perspektiwy w zetkanišću při bulwarje na Hasy Rosy Luxemburg 21. Štóž chce so wobdźělić, dyrbi so e-mailnje pod přizjewić.

Předsydka frakcije přijědźe