W mjenje hač štyrjoch mjeńšinach 29 poschodow přewinył je dobyćer lětušeho 19. „tower-runa“ po najwjetšim bydlenskim domje Berlina w Neuköllnje. Iranjan Ahmad Asadi z Frankfurta nad Mohanom trjebaše mjez 200 běharjemi za 465 schodźenkow jeničce tři mjeńšiny a 46 sekundow. Spěšniši běchu jenož wohnjowi wobornicy, kotřiž startowachu w swójskej klasy. Najspěšniši bě Markus Behrens z Zeuthena w třoch mjeńšinach a 28 sekundach.
Po placki do wobchoda přišoł je dwulětny hólčk w delnjošleskim Celle. Do toho bě wón z bydlenja twochnył, štož njebě mać pytnyła. Zaměrnje poda so wón k regalej słódkosćow a wopušći kupnicu, bjez toho zo by zapłaćił. Na parkowanišću pak lochko zdrasćeny pachołk žonje napadny. Čehodla je doma ćeknył, ma nětko młodźinski zarjad pruwować.
Zhorjelski sejmik je koncept wo integraciji za tamniši wokrjes w druhim pospyće na posedźenju loni w decembrje wobkrućił. Přewšo wobšěrne dźěło do toho bě so wudaniło.
Zhorjelc (UM/SN). Koncept pod hesłom „Přińć a bydlić w Zhorjelskim wokrjesu“ ma podpěrać, zo bychu so ludźo z migraciskim pozadkom do našeje towaršnosće integrowali. Hižo w měrcu 2017 bě wokrjesne zarjadnistwo prěni naćisk za tajki koncept předpołožiło, kotremuž pak radźićeljo njepřihłosowachu. Woni mějachu dokument skerje za wopisanje stawa hač za směrnicu do přichoda. Paralelnje k zarjadnistwu zapoda tehdy zdobom frakcija Lěwicy naćisk koncepta, kiž tohorunja žanu wjetšinu docpěł njeje.
Pančičansko-Kukowski hort, kotryž je w nošerstwje Miłočanskeho Křesćansko-socialneho kubłanskeho skutka, přiwabi zańdźeny pjatk tójšto wopytowarjow.
Pančicy-Kukow (SN/MiR). Dźeń wotewrjenych duri w nowym šulskim horće w Pančicach-Kukowje zajimowaše ludźi wšěch generacijow. „Smy cyle wědomje rozsudźili hort zjawnosći předstajić, a to jenož krótko po tym zo smy jón loni w decembru oficialnje wotewrěli. Sym zbožowny, zo je telko ludźi poskitk přijało“, rjekny wjesnjanosta Markus Kreuz (CDU), kiž cyłe popołdnjo mjez kubłarkami, wjesnjanami a hosćimi přebywaše. Kóžda rumnosć ma swoje wosebitosće. Wosebje powabliwa je wulka jědźernja, hdźež so dźěći k jědźi zetkawaja, ale hdźež móža zdobom woměrje swoje domjace nadawki spjelnić. Je to takrjec wjacezaměrowa rumnosć.
Wojerecy (SN). Pod hesłom „Strowota digitalnje. Smartne technologije w medicinje a hladanju“ rěka nowy slěd přednoškow we Wojerowskim kompjuterowym muzeju ZCOM, kotryž zahaja tam 23. januara w 17.30 hodź. Z nim chcedźa dać wotmołwu na prašenje mnohich ludźi, kotry pozitiwny přinošk móhła digitalizacija měć, zo hodźało so nuzy w hladanskim wobłuku wotpomhać a swójska strowota spěchować. W přednoškach z naslědnej diskusiju zajimcy wot fachowcow ze strowotniskeje branše přichodnje jónu wob měsac zhonja, kotre inowatiwne pomocne srědki, technologije a inteligentne asistencne systemy hižo dźensa eksistuja a hdźe su šansy a wužadanja digitalizacije.
Kolesy wobsedźerjej wróćić móhli
Běła Woda. Padustwu kolesow su swědcy sobotu popołdnju w Běłej Wodźe zadźěwali. Woni wobkedźbowachu, kak młodaj mužej na Humboldtowej zamknjenej kolesy wotnjeseštaj, a zazwonichu policiju. Zastojnicy muži w starobje 23 a 25 lět krótko na to zajachu. Rubiznu w hódnoće 1 400 eurow měještaj wonaj hišće při sebi. Wobsedźer so połdra hodźiny pozdźišo přewšo wjeseleše, zo jemu jeho wobsydstwo wróćichu.
Nuknica (SN/bn). W kopatej połnej Brězanec bróžni je wjesny klub Nuknica sobotu 21. jolka-swjedźeń wuhotował. Hesło wječora bě „Klumpańca na hrodźišću“. A tajku je předewšěm SG Sněhowka předstajiła. W swojim kabareće prašeše so skupina mjez druhim za „serbskej zemju“, nimo toho je pokazała, kak kapitalizm funguje: Samo jeli ničo njepředaš – ani „čwak Minakałskeje wjelčeje šunki ani sušenej delanskej morcheji“ –, ludźo swěru płaća. Trójce zanjese trójka swój hit „Satkula“.
Gołkojce (SN). Składnostnje 200. posmjertnin fararja Jana Bjedricha Fryca přeproša dźěłowa skupina Serbska namša jutře, wutoru, na wopomnjensku swjatočnosć do Gołkojc (Kolkwitz) pola Choćebuza, hdźež chcedźa na přełožerja Stareho testamenta do serbšćiny spominać. Wot 14.30 hodź. zaklinči w Gołkojskej cyrkwi pišćelowa hudźba. W 15 hodź. započnje so nutrnosć z dušepastyrku Katharinu Köhlerowej, a při rowje Fryca połoža wěnc. Po tym předstaja rodopisne slědźenja wo fararju. Wšitcy zajimcy su wutrobnje witani.
Ćežkochorych přewodźeć
Kamjenc (SN). Nowy přihotowanski kurs za přewod ćežkochorych a mrějacych zahaji so srjedu, 6. februara, w Kamjenskim zetkawanskim domje Carity. Pod hesłom „Přewodźeć nawuknyć“ ma kurs hač do 7. měrca trać – a to kóždu srjedu wot 17 do 21 hodź. kaž tež dwójce sobotu wot 9 do 15 hodź. Přizjewjenja su móžne w domje Carity w Kamjencu pod telefonowym čisłom 0 35 78 / 37 43 12. Tam dóstanu zajimcy dalše informacije wo kursu a jeho wobsahach.