Zymska přestawka koparjow so nachila, a to wot zwjazkoweje ligi hač k wokrjesnym klasam. Fanojo Wotrowskeho ki­ckeroweho turněra čakaja nětk samo hižo cyłe lěto, zo smědźa zaso přećiwo sebi wojować. Sobotu, 12. měrca, budźe potom skónčnje zaso tak daloko. Wotrowska młodźina a Serbske młodźinske towarstwo Pawk přeprošatej na 6. kickerowe wubědźowanje do Wotrowa, kotrež přewjedu tradicionelnje na tamnišej starej šuli.

Wuslědki a ličba lětušich přizjewjenjow – je jich 48 z 48 móžnych – poka­zuja, zo je turněr w Serbach jara po­pularny­. Tež mjez holcami zdawa so dźeń a woblubowaniši być. Daniela Dórnikec­ z Łusča a Caro Młynkec z Worklec běš­tej loni prěnja holča dwójka w sta­wiznach ki­ckerturněra, kotraž docpě finale. Kónčny duel drje doby team z Drježdźan a tak tež rjane kickerowe blido­. Dobyćerjej pak njejstaj sej je zdźeržałoj, ale da­rištaj blido młodźinskemu klubej w Hózku.