Jako halowy rěčnik Roman Hajnk po zwučenym wašnju Worklečanskich volleyballistow předstaji, so tróšku časa miny. K prěnjemu razej w tutej sezonje běchu mjenujcy wšitcy akterojo přitomni – tež Clemens Eckert, kiž bě zaso raz do domizny přichwatał. To běše tež wažne, wšako chcychu Worklečenjo z wuspěchomaj zwisk k načolnikej z Kupoje dźeržeć a sej hišće minimalnu šansu na mišterstwo wobchować. Do Worklec běštej tón dźeń posledni tabulki z Mittelherwigsdorfa a třeći z Kundraćic přijěłoj.

Viktoria Worklecy – Traktor Mittelherwigsdorf 3:0 (25:13, 25:14, 25:16)

Prěnja hra njeby směła poprawom k wulkim problemam wjesć, w předehrě pak Worklečenjo přećiwo Mittelherwigsdorfej najlěpši wukon njepokazachu. Tuž běchu warnowani a hnydom z najlěpšej šěstku započachu, zo njebychu žane nje­trjebawše dypki zhubili. To so tež poradźi. Fanam pokazachu najrjeńši volleyball. Čiste přiwzaća, precizne přihrawki a sylne nadběhi postarachu so wo spěšny předskok. Tak dóstachu hrajerjo na ławce hižo zahe swoju šansu.