ST Marijina hwězda
– ST Sepicy 1:3 (0:1)
Zestawa domjacych: O. Schmidt – Wróbl (65. Škoda), Czapik, Łušćanski, Lipič, Peschmann, Pakoßnick, T. Jurš, P. Schmidt, Winkler (60. Langer), D. Jurš
Prěnju hru w Sepicach běchu klóšterscy koparjo 7:3 dobyli, štož wězo tež doma chcychu. Před 82 přihladowarjemi so cyłkaj najprjedy raz neutralizowaštaj. Tróšku njezboža mějachu domjacy w 29. min., jako prasny wólny kop Pakoßnicka ze zdalenosće 18 metrow do łaty. Z ničeho padny w 41. min. 0:1. Hnydom štyrjo Pančičanscy hrajerjo stejachu spalěr, a Sepičan Abdin so z wrotami podźakowa.
W druhim połčasu njebě za ST Marijinu hwězdu konstruktiwny hrajny natwar móžny, dokelž dźěchu hosćo agresiwnje do dwubojow. Tak spytachu Pančičenjo z dołhimi třělwami wurunanje docpěć, štož so tež poradźi. Daloki wotkop wrotarja Schmidta njedósta přećiwniski wrotar po dwuboju z Pakoßnickom pod kontrolu, a Dawid Jurš suny bul k 1:1 (70.) do wrotow. Mjez 73. a 84. min. wuwostaji hosćićel hnydom štyri móžnosće. 1:2 (86.) nasta po konteru a 1:3 (90.), dokelž bě w škiće domjacych wšo wočinjene.
