Po cyłym swěće móhło hač do kónca 21. lětstotka 1 500 rěčow zańć

Canberra/Passau (dpa/SN/JBo). Wjace hač 7 000 rěčow ludźo na swěće nałožuja. Mnohe z nich pak su wohrožene. Praw­dźepo­dobnje móhło jich 1 500 rěčow hač do kónca 21. lětstotka zańć. To wujewja hakle njedawno wozjewjena studija Awstral­skeje narodneje uniwersity (ANU) w Canberra. Tež wjacore němske medije – mjez nimi Passauer Neue Presse – informuja, zo „móhła so ličba wotemrětych rěčow bjez zapřimnjenja w běhu jeno­ 40 lět potrojić, při čimž so kóždy měsac znajmjeńša jedna zhubi“, kaž to awtorojo studije pisaja. Tak woni namołwjeja plany wuwić, kotrež dwurěčnu wučbu podpěruja a zdobom wobknje­že­nje indigenych rěčow kaž tež wužiwanje regionalnje dominantnych rěčow spěchuja. Analyzowali su Canberrascy wě­domostnicy 51 wariablow, kaž kubłansku politiku, socioekonomiske indikatory a kajkosće wobswěta.