Wojerecy (KD/SN). Kruty dźěl Wojerowskich hudźbnych dnjow je koncert ze serbskej hudźbu na tamnišej hrodowej žurli. Wčera je kwartet „musica responsa“ z Budyšina pochadźaceje pianistki Heidemarje Wiesnerec twórby předstajił, kiž pochadźeja z pjerow Ludwiga von Beethovena, Ulricha Pogody a dalšich. Mjez druhim je ansambl z tenorom Stephanom Gählerom, cellistku Lindu Mančewu a huslerku Waltraut Elvers tež kruch „Mučny spěw“ z pjera Heide­marje Wiesnerec interpretował. Twórba je na zakładźe basnje Židowki Selmy Meerbaum-Eisinger nastała, kotruž je wona 1942 w němskim koncentraciskim lěhwje spisała. Wona zemrě w starobje 17 lět na typhus. Jeje lyrika je so wobchowała a bu po wójnje publicěrowana, kaž powědaše Heidemarja Wiesnerec. Komponistka-pianistka je hrónčko zhudźbniła we wobłuku projekta „hebrejske melodije“ 2021, spěchowany wot iniciatiwy „Neustart Kultur“ zwjazkoweho knježerstwa. W „spěwje“ z Bołharskeje suity op. 21 čo. 2 komponista Panča Haralanowa Wladigerowa stej Bołharka Linda Mančewa a Heidemarja Wiesnerec swoje wirtuozne kmanosće na instrumentomaj dopokazałoj.