Jasny dobyćer zhromadneho wothłosowanja nakładnistwa a nowin
Budyšin (SN/bn). „Bubličaj“ je hornjoserbske słowo lěta 2023 (HSSL). Wopřijeće wopisuje „w Aziskej popularny napoj ‚bubble tea‘, kajkiž tež młodźi Serbja dźeń a bóle lubuja. Lipšćanscy studenća wutworichu sej tuž tutón serbski kompaktny wotpowědnik, kotryž mjeztym tež hižo w serbskich medijach nańdźemy“, kaž čłon jury Michał Nuk, lektor Ludoweho nakładnistwa Domowina, rozłoži. Za prěnim dźělom nowotwórby „tči słowo bublinka, woznamjenjace wodowy pucherk. A tak podobnje wšak małe kulki, pjelnjene z gelom w najwšelakorišich słodach a barbach, tež wupadaja.“