Roman Mejgl, Frank Měškank, Markus Kobalc, Paul Hrjehor, Robert Lejnart, Handrij Šwejda, Gregor Čornak abo Florian Dórnik – lisćina serbskich koparskich legendow, kiž wojuje lěto wob lěto za swoje ródne wsy w Pěskecach wo pokal swjatki póndźelu, by hišće wo wjele dlěša być móhła. A to je jedna z přičinow, čehoždla je turněr tež hišće po tójšto lětach tak woblubowany. Stare zajacy měrja hromadźe z młodymi talentami swoje mocy a při kromje hrajnišća diskutuja lubowarjo kopańcy wo dwubojach, wrotach a dalšich temach. Młodźi fanojo nazajtra wo tym sonja, za někotre lěta tež na hrajnišću stać směć.

Spočatnje mjenowani hrajerjo běchu tež wčera zaso přitomni, jako so krótko do 13 hodź. wosom mustwow wokolnych wsow k zahajenju turněra nastupi. Nawodaj turněra, Fabian Korjeńk a Křesćan Bejmak po witanju hnydom na to apelowaštaj, zo steji fair-play na prěnim městnje. To su tež wšitke mustwa hač do kónca dosć derje dodźerželi, tak zo njemějachu sudnicy Pascal Budar, Sven Dankhoff, Heiko Hejduška a Enrico Förster přewjele nuzy, hry wjesć.