Choćebuz (HA/SN). W Delnjej Łužicy je so čas serbskich woblubowanych žnjowych nałožkow zahajił. „Kokoty“ su tu, kotrež wot 27. julija hač do 14. septembra na 22 wsach swjeća. Při tym kokota łapaja abo zabiwaja. Wjeršk budźe zarjadowanje superkokot 28. septembra w Dešnje. Tam wojuja wjesni prěni „kralojo“ kokota wo čestny titl super-krala.

Lětsa su prěnje zarjadowanja bohužel z njerjanymi diskusijemi zwjazane byli. Towarstwo za škit zwěrjatow PETA běše hižo loni skóržbu zapodało, dokelž so po jich měnjenju mortwy kokot hišće čwěluje. A to je přećiwo zakonjam. Wosebje weterinarny zarjad we wokrjesu Dubja-Błóta je na to skočił a nochcyše młodźinje w Běłej Gorje (Byhleguhre) dowolić kokota po starej tradiciji łapać.

Tójšto diskusijow je so wo tym wjedło. Nic jenož w Běłej Gorje, ale w cyłej Delnjej Łužicy, a protesty su přiběrali. Skónčnje dyrbjachu swjedźeń dowolić, z prawym honačom, ale z mnohimi přidatnymi wuměnjenjemi. Tak su kokota do toho zmjerznyć dyrbjeli!