Spočatk julija bě trenar prěnjeho koparskeho mustwa Sportoweje jednotki Njebjelčicy Daniel Pohling hrajerjow na treningowy zazběh witał. Do toho móžachu z Feliksom Hrjehorjom, Williamom Plaettnerom a Stefanom Bjeńšom třoch něhdyšich hrajerjow SJN kaž tež z Danielom Weclichom a Rafaelom Weclichom dweju młodych hrajerjow za mustwo muži rekrutěrować.

Srjedź julija hraješe SJN na něhdyšim skutkowanišću trenarja Pohlinga w Małym Wosyku. Partiju dobychu hosćo po połčasowym nawjedowanju 4:0 z kónčnym wuslědkom 6:3. Posledni kónc tydźenja w juliju přewjedźechu Njebjelčenjo wobšěrny treningowy kónc tydźenja. Pjatk, 26. julija, witachu hrajne zjednoćenstwo ST Postup Großharthau/ST Porchow. Njebjelčenjo hrajachu wot spočatka sem ofensiwnje dominantnje a hižo po 10 mjeńšinach z pomocu Stefana Bjeńša nawjedowachu. Dwě mjeńšinje pozdźišo docpě Bjeńš 2:0. Wot tutoho ofensiwneho hraća pozbudźowani zwyšeštaj wuslědk SJN koparjej William Plaettner a Feliks Hrjehor w 21. a 22. na 4:0. W 31. min. skrótši přećiwnik na 4:2. Bjeńš trjechi krótko do kónca prěnjeho połčasa pjate wrota za SJN.