Rěčespytnica Serbskeho instituta dr. Anja Pohončowa, rozłoži stawnicam a stawnikam, na čo maja při zapisowanju serbskich swójbnych mjenow ­dźiwać. Pozadk je nowy zakoń wo ­mandźelskim a ródnym mjenje, kotryž płaći wot 1. meje 2025.

Fulda. Dr. Anja Pohončowa z rěčespytneho wotrjada Serbskeho instituta je na zakónčacym plenumje lětneho fachoweho zeńdźenja Cyłoněmskeho zwjazka stawnikow a stawnicow w Fuldźe wo ­temje „Delan – Delanowa – Delanec. Jedne swójbne mjeno, tři formy – dohlad do serbskeje mjenoweje tradicije“ přednošowała. Přitomni stawnicy běchu jara zajimowani, za mnohich z nich bě to prěni kontakt ze serbskej rěču. Překwapjeni běchu wo wšelakorosći formow nastupajo splaha kaž tež wo na swójbny staw pokazowace kóncowki serbskich swójbnych mjenow žonow. Přednošowarka podšmórny na kóncu zwólniwosć Serbskeho instituta, jich při konkretnych naprašowanjach poradźować kaž tež wotpowědne wobkrućenja sformulować.