Budyšin (SN/Žu). Dobrych 60 zajimcow je wčera wječor w žurli zwjazka archiwow na Hrodowej w Budyšinje přednošk dr. Lubiny Malinkoweje wo putnikowanju Jurja Wawrika do Roma w lěće 1842 sćěhowało. Mjez hosćimi běchu tež potomnicy – praprawnučce a jeju swójbni – z Kanec pochadźaceho Wawrika. Malinkowa bě mjez druhim w Romje studowała a w tym zwisku wo putniskim dźeniku katolskeho Serba zhoniła. W archiwje SI pak jón njenamaka. Rukopisny dźenik je we wobsydstwje swójby, „a tam je tež na prawym městnje“, wona podšmórny. Wězo mjeztym w digitalnej formje předleži. 24. januara 1842 je so 26lětny Wawrik zhromadnje ze staršimaj sobuputnikomaj Mikławšom Ledźborom z Kulowa a Janom Deleńkom z Pěskec přez Alpy do juha podał. Železnica bě tehdy lědma wutwarjena, daloke dźěle puća zmištrowachu tuž pěši. Wěčne město Rom docpěchu po něšto wjac hač šěsć tydźenjach. Na awdiency Hrjehorja XVI. wuprosy sej Jurij Wawrik wot swjateho wótca žohnowanje za swoju swójbu a za klóšter Marijinu hwězdu.