Za sociokulturelny centrum w Budyšinje je přichod nadal njewěsty

Budyšin (SN/MG). Wot lěta 2018 je sociokulturelny Thespis-centrum kruty wobstatk kulturneho žiwjenja w Budyšinje. Srjedź januara pak bě jasne, zo kulturna załožba Sakskeje centrum hižo dale spěchować njebudźe. To bě šok, wosebje za nowy nawodny team centruma. Hakle w decembrje běchu Petra Seurich, Halimeh Ibrahim a Yana Hummena dźěłać započeli. Nětko je tež jich přichod njewěsty. Z Budyskeho dźiwadła njeje so dowoloweho časa dla nichtó k situaciji wuprajić chcył. Spočatk januara pak běše so intendant dźiwadła Lutz Hillmann w nowinskej zdźělence wo rozsudźe kraja takle wuprajił: „Rozsud scyła rozumić njemóžemy. Z tym zniči so dźěło zašłych sydom lět; to je kulturna katastrofa, kotraž změje dramatiske sćěhi.“