Nowa brošurka wo stawiznach a přichodźe módroćišća we Łužicy wušła

Janšojce (SN/bn). Módroćišć, lětstotki stare tekstilne wuměłstwo a wot lěta 2018 z dźělom imaterielneho kulturneho herbstwa UNESCO, steji w srjedźišću noweje brošurki „Blaudruck in der Lausitz – Vergangenheit und Zukunft“, kotruž staj wudawaćelej-awtoraj Wolfgang Jenč a Daniel Häfner dźensa w Serbsko-Němskim domizniskim muzeju Janšojce předstajiłoj. Publikacija wobswětluje stawizny módroćišća we Łužicy z wjace hač 50 historiskimi stejnišćemi. Wona pokazuje pak tež na dźensniši wuznam wuměłstwa a skići fachowcam kaž tež zajimowanym lajkam dohlady do tohole fascinowaceho rjemjesła. Zešiwk budźe w muzejach a domizniskich stwach regiona za samokóšty kryjacu płaćiznu na předań.