Knižne wiki ze skandinawiskej royalnej pychu a łužiskim barbnom

Lipsk (SN/bn). „Worte bewegen Welten“ je hesło lětušich Lipšćanskich knižnych wikow, kotrež wotewru kónc měrca ze spožčenjom Lipšćanskeho knižneho myta za europske dorozumjenje. Lawreat je běłoruski spisowaćel Alherd Bacharewič. Lisćina kandidatow za wuznamjenjenja na polu beletristiki, wěcneje literatury a přełožowanja bu dźensa wozjewjena. Tak mjenowana shortlist wopřijima dohromady 15 z cyłkownje wjace hač 500 zapodatych namjetow. Prěni raz su wiki z hosćićelom spožčenja němsko-francoskeho literarneho myta Franza Hessela.

Program po swójskim podaću nastupajo ličbu wopytowarjow najwjetšich wikow w Němskej wopřijima tónraz cyłkownje wjace hač 2 500 zarjadowanjow z něhdźe 2 900 sobuskutkowacymi na 300 městnosćach. Hóstny kraj je Norwegska, mjez druhim předstaja so w tym zwisku awtorki Maria Parr, Vigdis Hjort a Maja Lunde. Wotewrjenje wotpowědneho stejnišća přewozmje krónprincesna Mette-Marit.