Claudius Buša z Radworja wopytuje tuchwilu powołansku šulu w Budyšinje, hdźež chce swoju fachowu maturu złožić. Dźěl šulskeho programa je absolwowanje praktikuma. 17lětny je so za wosebitu městnosć rozsudźił: Serbski rozhłós. Hižo wjacore měsacy je wón spočatk kóždeho tydźenja w rozhłosowym studiju, mjeztym zo so teoretiske wukubłanje w druhej połojcy tydźenja wotměwa. Tak zběra hižo sčasom praktiske nazhonjenja na polu medijow a techniki. Jeho nadawki su mnohostronske: W hudźbnej redakciji přihotuje Radworčan mj. dr. pokazki na hudźbne titule, kotrež so w rańšim wusyłanju wothrawaja. Tež w techniskim wobłuku swojich kolegow podpěruje – hač při natwarje, při zwukowych natočenjach abo při techniskich přihotach wusyłanjow. Tola to njeje wšitko: Claudius so tež w Radiju Satkula, młodźinskim wusyłanju serbskeho rozhłosa, angažuje. Tež tam je do wjacorych nadawkow zapřijaty. Wón přihotuje přinoški, stara so wo hudźbny přewod a tež sam moderěruje.