Genialna ideja: Spowědź jako dar zbližić
Pjeć předstajenjow, njecyłe 200 sobuskutkowacych a pomocnikow kaž tež połdratysac přihladowarjow. Ličby to, kotrež njewědźachu sej ći, kotřiž dźeržachu wotežki projekta „Z TOBU – Bohu swjećene lěto“ w rukomaj, spočatnje předstajić.
Mjeztym je jewišćowa produkcija takrjec „wothrata“. Mnozy pak so dale z njej zaběraja. Jedna je hrajerka maćerje tam předstajeneje swójby Bernadet Ričlowa. Ju su widźeli w róli maćerje a ćety Rejzki.
Kreatiwnym žiłkam přisporjeć
Budyšin (SN). Towarstwo Kamjentny dom a partnerojo wuhotuja přichodnej pjatkaj znowa dźěłarničku Pop2Go. Stajnje wot 14 hodź. poskićuja so wšelake hudźbne, rejowanske, dźiwadłowe a awdiowizuelne wuměłske workshopy. Program wopřijima mjez druhim instrumentowy karusel, při kotrymž móža so wobdźěleni na wšelakich „klasiskich“ instrumentach kaž tež na elektroniskich nastrojach, kaž su to na přikład synthesizer, drumpad a sampler, wuspytać. Zhromadnje z profesionalnymi hudźbnicami a hudźbnikami móža nimo toho swójske a/abo zhromadne spěwy skomponować a aranžować. Zdobom maja so we wobłuku jednotliwych segmentow dźěłarnički ideje wuwiwać a přeća hromadźić. K tomu měli wobdźělnicy na prašenja wotmołwić, kaž na přikład: „Kotru hudźbu najradšo słyšiće?“ „Kotři wuměłcy so wam lubja?“ „Kotry wólnočasny program přejeće sej we wobłuku Pop2Go-projektow?“ Wuslědki idejowych workshopow zapřijeja so bjezposrědnje do wuhotowanja slědowacych projektow a prózdninskich campow.
Nakładnistwowe myta spožčili
Dorostej atraktiwny instrument spřistupnić
Budyšin (SN). Po dlěje trajacym procesu namakanja zhromadneho termina wotmě so fachowy sympozij za „wobstaće a dalewuwiće serbskich dudow“ minjenu sobotu w Budyskej Röhrscheidtowej bašće. Intendant Serbskeho ludoweho ansambla Tomas Kreibich-Nawka a zamołwity za wuwiće dudow Handrij Henčl běštaj na zetkanje přeprosyłoj. SLA bě prěni raz zarjadowanje tajkeho razu iniciěrował. Znaći serbscy dudakojo, tak Tomasz Nawka a Steffen Kostorž z folklorneje skupiny Sprjewjan kaž tež Wolfgang Kotissek ze Slepjanskeho folklorneho ansambla, běchu přeprošenje sćěhowali. Z hudźbnych kubłanišćow, kotrymž běchu wobdźělenje poskićeli, bě jeničce Budyska wokrjesna hudźbna šula přitomna. Ju zastupowaca Margitta Luttner poda impulsy nastupajo wukubłanje hudźbnych wučerjow za dudy, wšako „runje tam dorost pobrachuje. Bjez wučerjow njehodźi so instrument přichodnym generacijam dale sposrědkować“, wona podšmórny. Z „nowymi, načasnymi kruchami hodźała so atraktiwita instrumenta mjez šulerjemi stopnjować.
Na aktiwnu podpěru pokazany
Demokratija, wójna a migracija ćežišća prěnjeje „Budyskeje narěče“
Budyšin (TN/SN/bn). Nowy format „Budyske narěče“, wuhotowany wot iniciatiwy „Budyšin zhromadnje“ a Ekumeniskeho tachantskeho wobchoda sprjewineho města, je minjeny pjatk wjace hač 150 zajimcow do tamnišeje cyrkwje swj. Pětra přiwabił. Prěni rěčnik bě tuchwilny minister za hospodarstwo a wědomosć w Durinskej Wolfgang Tiefensee (SPD). Politikar powědaše so předstajejo wo swojej biografiji, mjenujo ju za wuchodnu Němsku typisku. Mjez druhim wón wuzběhny, zo „njeje runy puć stajnje najkmańši“, pokazawši na swojeho politiskeho nastajenja dla wobmjezowane móžnosće nastupajo wukubłanje a powołanje. Po politiskej změnje zastupi do SPD, dokelž bu „něhdy załožena, tak mjenowane socialne prašenje rozrisać. Dźensa mam za naš najwažniši nadawk, socialnu njesprawnosć wotstronić a nic socialnu sprawnosć wutworić. Něchtó dźě njemóže dokładnje rjec, što tajkule sprawnosć wučinja.“
Jónkrótna akcija
Wjesne tradicije w 1950tych lětach
Budyšin (SN/bn). We wobłuku zhromadneho rjadu Nysoweho filmoweho festiwala, Serbskeho ludoweho ansambla, Domowiny, Kamjentneho domu, Serbsko-němskeje syće Łužycafilm a Załožby za serbski lud „Łužiske dohlady“ dožiwi minjeny pjatk 15 zajimcow na žurli SLA prezentaciju třoch dokumentacijow, nastatych w 1950tych lětach jako wučbne paski. Film „Rockenstock und Zamperstrauß“ wotbłyšćuje wjesne tradicije w srjedźnej a Delnjej Łužicy, kaž na přikład plahowanje a předźěłanje lena kaž tež camprowanje. Produkcija „Wenn Jan und Lenka Hochzeit machen“ dokumentuje serbski kwas. „Hexennacht und Maientanz“ pokaza chodojtypalenje a mejemjetanje w Hornjej Łužicy. Režiser wšitkich filmow je Hans-Günter Kaden, scenarije su z pjera Měrćina Nowaka-Njechorńskeho a Jana Meškanka. Hudźbu za nje běštaj Jurij Winar a Helmut Fryča skomponowałoj. Z nimaj „twori so zdobom móst k jubilejej 70lětneho wobstaća SLA, wšako běštaj jako direktor resp. chórowy nawoda prěnjej načolnikaj ansambla“, intendant SLA Tomas Kreibich-Nawka podšmórny.
SJ Njebjelčicy
Konjaca kniha zaso předleži
Stawiznar je nowy prezident
Europska uniwersita Viadrina sadźa na fachowca za wuchodnu Europu
Frankfurt nad Wódru/Slubice (RD/SN). Senat a Załožbowa rada Europskeje uniwersity Viadriny w Frankfurće nad Wódru stej njedawno fachowca za Pólsku a historikarja wuchodneje Europy prof. dr. Eduarda Mühlu za noweho prezidenta woliłoj (SN informowachu).
Prof. dr. Eduard Mühle narodźi so w lěće 1957 a studowaše stawizny, slawistiku, filozofiju a teologiju w Paderbornje, Jerusalemje, Münsteru a Londonje. Po slědźenskich přebytkach w Kijewje, Leningradźe, Nowgorodźe a Moskwje je wón w lěće 1990 promowował. Po skutkowanju za nowinu Frankfurter Allgemeine Zeitung, Němsku slědźensku towaršnosć a Konferencu rektorow Wysokich šulow bě wot lěta 1995 do 2005 direktor Leibnizoweho instituta za slědźenje wo wuchodosrjedźnej Europje w Marburgu.
