Zmylki njehodźa so ženje dospołnje wobeńć. A to njeje scyła zlě. Nawopak, wšako podarmo njerěka, zo hakle z njedostatkow, misnjenjow a mylenjow woprawdźita mudrosć wurosće – abo ze słowami lawreata Nobeloweho myta za fyziku Franka Wilczeka: „Nječiniš-li nihdy zmylk, njejsu problemy, z kotrymiž so rozestajuješ, naročne dosć. A to je wulki zmylk.“ Wažne w tym zwisku wšako je, něšto z toho wuknyć, kaž Konfucius rjenje zjima: „Štóž je prěni zmylk naworał a jón njesporjedźi, skući hižo druhi.“

Hač je mudrje, tele dny tak a znak hižo wosłabjenu Lěwicu a jich potencielne wolerstwo ze załoženjom noweje strony – zaso tele słowo! – pačić, njehodźi so hišće rjec. Wočakńmy wólby. Zamołwitym pak měli stawizny Weimarskeje republiki z přičinu być, zmylki znajmjeńša njewo­spjetować. Wobstajne wojowanja wo­srjedź lěweho politiskeho spektruma – hlej SPD, USPD, KPD, KPD-O atd. – njejsu ani „proletariatej“ pomhali ani postupej nacionalistiskich hibanjow a naposledk nacionalsocialistow zadźěwali.