Manfred Hermaš, njesprócniwy wjelelětny wojowar za serbske naležnosće w Slepjanskej kónčinje, swjeći dźensa w Rownom swoje 75. narodniny.

Manfred Hermaš bě ze slepjanšćinu doma w Brězowce wotrostł a so w njej pozdźišo wukmanjał. Tež hornjoserbšćinu sej přiswoji. Hižo čas žiwjenja skutkuje wón za serbstwo z horcej wutrobu, najintensiwnišo pak wot časa přewróta 1989. Hač do 2014 běše to zdobom jeho powołanski nadawk jako regionalny rěčnik Domowiny. Jeho powołanski wuspěch pak njeby tajki był, njeby-li wón na mnohich wšelakich polach serbskeho a towaršnostneho žiwjenja – w gmejnje, wosadźe, wokrjesu a na krajnej runinje – přeze wšě lěta hač do dźensnišeho čestnohamtsce aktiwny był.

Tak bě na přikład wjacore legislaturne periody z čłonom Serbskeje rady w Sakskej a Zwjazkoweho předsydstwa Domowiny. Wot 2013 do 2021 skutkowaše jako župan na čole župy „Jakub Lorenc-Zalěski“. Hač do dźensnišeho je Hermaš čłon župneho předsydstwa. Nimo toho je zamołwity za serbske prašenja Ewangelskeje cyrkwje Berlin-Braniborska-šleska Hornja Łužica a předsyda tamnišeje serbskeje přirady.