Wučer a spisowaćel Jan Bogumił Nytška narodźi so 18. małeho róžka před 200 lětami do chudeje swójby krawca we Wojerecach. Na wučerskim preparandźe w Bórkhamorje přihotowaše so na studij wučerstwa w delnjołužiskej Starej Darbni. Wučerješe najprjedy w Sprjejcach a poda so do cuzby jako wučer w syrotowni w Düsselthalu w Poruhrskej. Tam dwanaće lět dołho přebywaše. Wot lěta 1858 do 1894 bě z wučerjom w Essenje a poda so po tym na wuměnk do Charlottenburga. Wón bě w Poruhrskej pólšćinu nawuknył a je nimo šulskeje wučby za tamnišich ewangelskich pólskich dźěłaćerjow, zawěsće tež za Kašubow, nabožne hodźiny podał a so wo nich z dobrej radu starał. Jako swěrny Serb, kiž hornjo- a delnjoserbšćinu wobknježeše, bě w Blunju wotrostł. Zdobom bě z čłonom Maćicy Serbskeje a delnjoserbskeje Maśicy. W Serbskich Nowinach a w časopisu Łužičan wozjewi prawidłownje pućowanske rozprawy z domizny a z Poruhrskeje kaž tež dopomnjenki na dźěćatstwo a młodosće kaž na př. „Pastyrske žiwjenje w Blunju před 60 lětami“. Zaběraše so dale z rěčespytom.