Pozdźiši wučer a kěrlušer Michał Haupt je so 16. małeho róžka 1750 do swójby chěžkarja w Lubjencu narodźił. Wopyta wjesnu šulu we Wulkim Wjelkowje. Nadarjeny pachoł bu jako jedyn z prěnich Serbow na wučerja wukubłany, kotryž bě zdobom serbski spisowaćel a přełožowar. 1774 nastupi prěnje městno jako wučer w swojej bywšej šuli we Wulkim Wjelkowje a wučerješe tam hač do smjerće 19. nalětnika 1799. Z Lutherowych dźěłow je wón wšelake pojednanja wo wysokich swjatych dnjach kaž hodach, jutrach a swjatkach přełožił. Wulkowjelkowski knježk August Adolph von Below, kotryž bě wukubłanje Michała Haupta na wučerja spěchował, bě ćišć přełožkow zapłaćił a je darmotnje swojim roboćanam posrědkować dał. Z tym chcyše pietistisce zmysleny zemjan tež serbske čitanje a křesćanske kubłanje swojich poddanow spěchować. Haupt zeserbšći dale „Jana Albrechta ­Bengela šěsćdźesat wutrobnych rěčow“ a „To ­třicećilětne ćiche žiwjenje našeho Knjeza a Zbóžnika“. Přełoženej pojednani buštej w Budyšinje ćišćanej.