Turkowske žadanje, ale w zjawnosći připóznaće

Berlin (dpa/K/SN). Turkowski prezident Recep Tayyip Erdoğan sej na žane wašnje njeda lubić, zo jeho něchtó w telewiziji satirisce přewochluje a z tym na česći rani,­ kaž ma wón tajke něšto za to. A dokelž je so satirikar ZDF Jan Böhmermann tajkeho „nješwarneho přeńdźenja“ dopušćił, chce hłowa Turkowskeje „hrěšnika“ měć pochłostaneho. Kaž statne rěčnistwo w Mainzu wčera wječor wozjewi, předleži jemu Erdoğanowe žadanje za pochłostanjom Böhmermanna. Do toho bě Turkowska zwjazkowe knježerstwo formelnje napomniła, zo by so za pochłostanje Böhmermanna zasadźało. Naměstnik­ turkowskeho ministerskeho prezidenta Numan Kurtulmuş ma Böhmermannowe počinanje za „ćežke złóstnistwo přećiwo čłowjeskosći“. Wona baseń njekřiwdźi jeno prezidenta, „ale zdobom­ 77 milionow Turkow“. Rěčnik knježerstwa­ Steffen Seibert rjekny, zo próstwu Ankary tuchwilu pruwuja. Po měnjenju šefa Zelenych Cema Özdemira je zwjazkowe knježerstwo w padźe Böhmermanna­ w „njeluboznej situaciji“.