Hižo 21. apryla so załožbowa rada znowa zeńdźe

Choćebuz (SN/at). Załožba za serbski lud změje noweho direktora. Jeje rada je Jana Budarja na swojim posedźenju wčera w Choćebuzu po nimale šěsćhodźinskim wuradźowanju do tohole zastojnstwa wu­zwoliła. Po njewuspěšnymaj pospytomaj, načolnu funkciju załožboweho zarjadnistwa znowa wobsadźić, je so to nětko poradźiło. Třo kandidaća su so załožbowym radźićelam předstajili. Předsyda parlamentariskeje přirady Załožby za serbski lud, zapósłanc Sakskeho krajneho sejma Marko Šiman (CDU), je wuradźowanje nawjedował. Wón ma je „za jara konstruktiwne. Bě to wulka šansa, z dobrych kandidatow wuzwolić.“ Radźićel Bjarnat Cyž, jednaćel Domowiny, skedźbni na transparentosć procedury. „To běchu nošni kandidaća. Wobjednachmy personalny rozsud. Tuž njeje rada ženje pod ćišćom stała, wuspěšna być“, rjekny wón na prašenje Serbskich Nowin.