Na wjesny swjedźeń
Njebjelčicy. Wot dźensnišeho pjatka hač do njedźele swjeća w Njebjelčicach wjesny swjedźeń. Wot 17 hodź. přeprošuja tam na party inkluzije. Mjez druhim přewjedu beerpong-wubědźowanje. Sobotu přizamknje so „H.L.B-party“. Njedźelu wot 11 hodź. čaka na wobydlerjow a hosći pisany program.
PoŠtyrjoch a Nowa Doba live
Budyšin. Bara Sundowner pod Röhrscheidtowej baštu w Budyšinje je kónc tydźenja z hosćićelom dweju koncertow serbskich wuměłcow. Dźensa, pjatk, zaspěwaja wot 18 hodź. hercy PoŠtyrjoch sep znatych serbskich, němskich a słowjanskich pěsnjow a cappella. Jutře slěduje w samsnym času wustup hiphopowcow Noweje Doby, kotřiž pod hołym njebjom swój aktualny album „Stara šula“ live prezentuja. Zastup je stajnje darmotny.
Mineralije w fabrice
Hórnikecy. Towarstwo přećelow mineralogije a geologije wuchodneje Sakskeje přewjedźe jutře, sobotu, wot 10 hodź. „18. łužisku bursu mineralijow“. Wikowarjo, zběrarjo a zajimowani hosćo „móža so tam wuměnjeć a swoje zběrki rozšěrić“. Nimo toho wěnuja so z małej wustajeńcu mineralej lěta baryt.
