Prěnje mustwo Viktorije Worklecy hraje nětko hižo někotre lěta w Sakskej klasy. Domjace hry su so stajnje tež we Worklecach wuhrali. Nětko pak je hala nadobo přemała. Jurij Bjeńš je so ze Sćěpanom Wjeńku rozmołwjał, kak je k tomu přišło.

Sćěpano, hraja w Sakskej klasy nowe postajenja jednu rólu abo čehodla njesměće wjac we Worklecach wo dypki wojować?

S. Wjeńka: Ně, tute postajenje hižo dołho eksistuje. Tola runje tak je móžno, z wuwzaćemi w mjeńšej hali hrać. To smy stajnje tež směli. Nětko pak su loni naše žony do Sakskeje klasy postupili a tam su so někotre přećiwniske mustwa přez wysokosć hale mjerzali a to do protokola zapisali. Sportowe sudnistwo je sej na to dyrbjało měry wobhladać a dokelž měry njetrjechja, su nam za nowu sezonu zakazali, na Sakskej runinje domjace hry we Worklecach přewjesć.

Wo kelko metrow abo centimetrow je Worklečan hala nětko přemała?

S. Wjeńka: We wysokosći faluje něhdźe połdra metra a w šěrokosći jedyn meter.