Tež druhdźe zaběraja so z wotsunjenjom ćěkancow

Berlin/Brüssel (dpa/K/SN). We wadźeńcy azyloweho paketa II dla ma so dźensa doskónčne rozrisanje nadeńć. Znajmjeńša je to wotpohlad nawodnistwow unije a SPD, hdyž so wonej na pózdnim popołdnju znowa zetkatej. Šefojo CDU, CSU a SPD běchu so hižo spočatk nowembra wo wotpowědnych planach zasadnje dojednali. Jadro paketa je, zarjadować přijimarnje, w kotrychž móža próstwy wo azyl wěstych škit pytacych ze spěšnej proceduru wobdźěłać. Nimo toho je předwidźane, tež migrantam z wurjadnym (subsidiarnym) škitnym statusom přićah swójbnych wobmjezować.

Dźensa wječor zeńdźe so kanclerka Angela Merkel (CDU) z ministerskimi prezidentami krajow. Při tym ma mjez druhim hić wo wotsunjenje kriminelnych ćěkancow, wo móžne připokazanje bydlen­skeho městna připóznatym ćěkancam a wotmyslene zastopnjowanje Marokka, Algeriskeje a Tuneziskeje do kategorije wěstych pochadnych statow.