Zapósłancy prezidij parlamenta wuzwolili – Gregor Gysi zeńdźenje zahajił

Berlin (dpa/SN). Třiceći dnjow po wólbach je so nowy zwjazkowy sejm dźensa k swojemu prěnjemu posedźenju zešoł. Z tym zahaji so 21. legislaturna doba sejma. Zahajił je konstituowace posedźenje starobny prezident, zapósłanc Lěwicy Gregor Gysi. Wón je zapósłanc z najdlěšim słužbnym časom w sejmje. Hač do lěta 2017 bě starobny prezident stajnje najstarši zapósłanc sejma.

W swojej narěči Gysi zapósłancow ­namołwješe, swojej zamołwitosći wot­powědować a politiske debaty wěcownje a na runinje mjezsobneho respekta wjesć. Bjezposrědnje po tym wuzwolichu zapósłancy nowu prezidentku zwjaz­koweho sejma. Dotalnu prezidentku, ­socialdemokratku Bärbel Bas (SPD), na­slěduje bywša zwjazkowa ministerka za ratarstwo Julia Klöckner (CDU). Tradi­cionalnje ma najsylniša frakcija sejma prawo, tute zastojnstwo wobsadźić, kotrež je protokolarisce druhe najwažniše w zwjazkowym sejmje.

Sakski bazar nałožowanja dawkowych pjenjez je zahajeny. Po planje mjeńšinoweho knježerstwa CDU/SPD ma so plan personala wot 96 500 na 96 100 městnow redukować. Štóž połdra lětdźesatka wróćo ­hlada, dopomina so na ministerskeho prezidenta Stanisława Tilicha, kiž chcyše ličbu ludźi w słužbje kraja wot 88 000 na 70 000 pomjeńšić. Knježaca politika je so najebać dale a wótřiše warnowanja zličbowanskeho zarjada za nawopačny směr rozsudźiła. Problemy pak z tym rozrisała njeje, běrokratija ludźi dźeń a bóle wobćežuje, a na šulach registruja spochi nowe rekordy wupada wučby najebać wšě ofensiwy nawabjenja personala. Nětk dyrbi knježerstwo hišće přeća BSW, Zelenych a Lěwicy spjelnić, zo by wjetšinu za etat 2025/2026 dóstało. A na přikład rjemjeslnicy, kotřiž maja ze samsnymi ludźimi wjac nadawkow zdokonjeć, žadanja bě­rokratije spokojeć a to wšo z dawkami ­financować, so mjerzaja. Snadź měješe ­Tilich prawje? Marcel Brauman

W domizniskim muzeju w Dešnje su předwčerawšim, njedźelu, wustajeńcu „Woheń, woda a debjene jejka“ wotewrěli. Nimo informacijow wo serbskich jutrownych nałožkach kaž jutrownym wohenju abo jutrownej wodźe wěnuje so muzej žiwjenju a skutkowanju ratarja Helmuta Kurja (1935–2023) z Blunja. Wón je serbsku drastu znał, bě ludowy wuměłc a braška a je jutrowne jejka debił. Na jutrownych wikach w Budyšinje, Slepom abo Nowej Łuce bě wjele lět swěru prezentny. Wot załoženja Blunjanskeho kwasneho ćaha 1966 bě Kurjo zahority braška. Jako tajkeho su jeho na festiwalach serbskeje kultury a na druhich zarjadowanjach znali. Foto: Michael Helbig

Drježdźany (dpa/SN). Hłubokeje dźěry we Łobju dla so přihoty za wottorhanje Carolineho mosta w Drježdźanach dlija. Tak mjenowany kolk – přirunujomny z hłubokej dźěru na dróze – su mi­njeny tydźeń našli. Dźěra je tři do štyri metry hłuboka, Simone Prüfer, nawodnica měšćanskeho zarjada za dróhotwar, zdźěla. Runje na tutym městnje su róšty stajić chcyli, kotrež maja hišće stejacy dźěl mosta při dalšich dźěłach stabili­zować.

Poprawom chcychu róšty tutón tydźeń natwarić. Město toho dyrbja nětko najprjedy kolk zasypać a ze železnej konstrukciju zakryć. Přichodny tydźeń dalšu pomocnu konstrukciju natwarja. Za to trěbne pontonowe dźěle su mjeztym z Čěskeje přiwjezli a na staroměšćanskim dźělu Łobja přiwjazali. Elementy słuža róštam jako fundament.

Najebać nowe problemy twarske dźěła wokomiknje hišće časowemu planej ­wotpowěduja, Prüfer rjekny. Hłowny zaměr, kónc meje srjedźny dźěl mosta wuzběhnyć, njeje wohroženy. Planowane je, srjedźny dźěl mosta na pobrjóh dowjezć a tam rozkuskować.