61. kongres organizacije narodnych mjeńšin w Pólskej zakónčeny

Wrócław (SN/MkWj). Loránt Vincze je nowy prezident Federalistiskeje unije europskich narodnych mjeńšin FUEN. Wobdźělnicy 61. kongresa FUEN wuzwolichu jeho kónc tydźenja we Wrócławju do zastojnstwa. 38lětny Vincze, kandidat madźarskeje mjeńšiny w Rumunskej, bě so při wólbach ze snadnym předskokom přećiwo kandidatej danskeje mjeńšiny w Němskej, Dieterej Paulej Küssnerej (74), přesadźił. Hans Heinrich Hansen, kiž bě FUEN dźewjeć lět nawjedował a cyłkownje 22 lět w prezidiju organizacije sobu skutkował, njebě hižo k wólbam nastupił. Jemu spožčichu titul čestneho předsydy. FUEN zastupuje cyłkownje 91 čłonskich organizacijow w 32 europskich krajach. Serbja su w prezidiju FUEN z Bjarnatom Cyžom, jednaćelom Domowiny, dale zastupjeni. Nowy prezidij FUEN chce so za čas europeady w Južnym Tirolu prěni króć schadźować.