Serbska kulturna informacija wostanje w Budyskim Serbskim domje

Drježdźany/Budyšin (SN/JaW). Dołho diskutowane móžne přeměstnjenje Budyskeje Serbskeje kulturneje informacije do Röhrscheidtoweje bašty je z blida. To je najwažniša powěsć wčerawšeho wuradźowanja rady Załožby za serbski lud w Drježdźanach. „Hłowne stejnišćo SKI wostanje Serbski dom“, wobkrućištaj předsydka załožboweje rady Susann Šenkec a załožbowy direktor Jan Budar wčera w Drježdźanach. „SKI pak budźe k wosebitym přiležnosćam rumnosće bašty wužiwać a tam wo Serbach informować kaž tež za serbsku kulturu wabić“, Budar připowědźi. Zdobom ma wona swoje wabjenske aktiwity rozšěrić.