Přećiwnicy noweje wulkeje koalicije wabja wo nowych čłonow SPD

Berlin (dpa/SN). Po snadnym wuslědku wothłosowanja wo zahajenju koaliciskich jednanjow registruja w SPD we wjacorych zwjazkowych krajach nowych čłonow. Najwočiwidniše je to w Bayerskej a Berlinje: W Bayerskej su jeničce póndźelu sto internetnych zastupow do strony zličili. W Berlinje přijachu 70 próstwow wo čłonstwo w SPD.

Pozadk móhł wuslědk wothłosowanja na stronskim zjězdźe z runje 56,4 procentami přihłosowanja być. Po zakónčenju koaliciskich jednanjow dóńdźe k dalšemu wothłosowanju wo wuslědku. Potom rozsudźi wjace hač 440 000 čłonow SPD. Woni maja poslednje słowo.

Bjezposrědnje po zjězdźe w Bonnje su młodźinska organizacija socialdemokratow (jusosy) a dalši přećiwnicy wulkeje koalicije ludźi pod hesłom „Zastup a praj ně“ namołwjeli, do SPD zastupić a potom přećiwo koaliciji hłosować. Jedyn z najraznišich přećiwnikow noweje wulkeje koalicije je předsyda jusosow Kevin Kühnert. Wón je mjeztym připowědźił, zo chcył po wšej Němskeje zarjadowanja přewjesć a za swoje pozicije wabić.