Čěski senat naležnosće Serbow wobjednał

Praha (SN/MkWj). Runjewon historiski to wokomik wčera w čěskej stolicy: Senat, delnja komora parlamenta Čěskeje republiki, je so prěni króć cyle oficialnje z naležnosćemi Łužiskich Serbow zaběrał. Činili su to we wobłuku zjawneho słyšenja wuběrka za „čěskich krajanow we wukraju“ – za tajkich mjenujcy w susodnym kraju Serbow maja.

Organizował bě zarjadowanje na wulkej žurli historiskeho Valdštejnskeho palaisa městopředsyda wuběrka, wjelelětny přećel Serbow Jaromír Jermář, kiž posedźenje nawjedowaše, zhromadnje z Towarstwom přećelow Serbow a jeho předsydu Lukášom Novosadom. Hłowny zaměr cyłodnjowskeho zarjadowanja bě, senatoram a hosćom wšu paletu serbskich naležnosćow znazornić.