Podstupim/Frankfurt nad Wódru (RD/SN). Braniborski ministerski prezident Dietmar Woidke skutkuje tež za nowe zwjazkowe knježerstwo jako koordinator za němsko-pólske zhromadne dźěło. Politikar SPD njedźelu rjekny, zo je wo­spjetny poskitk zwjazkoweho wonkowneho ministra Heika Maasa (SPD) „jara rady přiwzał“. Po słowach Woidki „mamy styki blisko hranicy hajić. Tam so tójšto stawa, za to sym kóždemu jednotliwcej jara dźakowny, kiž so w małym abo we wulkim angažuje.“ Kaž Woidke rozłoži, „mamy z pólskim knježerstwom we Waršawje dobry a konstruktiwny dialog ­pěstować“. Tohodla wón wuraznje wita, zo staj zwjazkowa kanclerka Angela Merkel (CDU) a wonkowny minister Maas swojej prěnjej jězbje do wukraja krótko po wutworjenju knježerstwa do Francoskeje a Pólskeje wotměłoj.