Berlin (dpa/SN). FDP je zwjazkowy sejm namołwjała knježerstwu wosebite prawa zaso sćazać, kotrež bě jemu sejm koronapandemije dla spožčił. Tuchwilne połoženje w Němskej „wosebite prawa knježerstwa hižo njewoprawnja“, praji nutřkopolitiski rěčnik Konstantin Kuhle ­powěsćerni dpa. Dale wón rozłoži: „Epidemiske połoženje narodneho rozměra, z kotrymž hodźa so prawa parlamenta wobmjezować, hižo njewobsteji.“ Na lokalne wudyrjenje koronawirusa móža kraje a komuny po zakonju wo škiće před infekcijemi sami reagować. „Zwjazkowy sejm dyrbi nětko jednać.“

Strowotniskopolitiska rěčnica frakcije FDP Christine Aschenberg-Dugnus rjekny powěsćerni: „Mjeztym zo mějachmy za čas wobzamknjenja w měrcu wšědnje 4 000 do 6 000 nowych infekcijow, je jich tuchwilu hišće 200 do 400.“ Strach přećeženja narodneho strowotnistwa wjace njewobsteji. „W Schleswigsko-Holsteinskej lěkuja tele dny hišće pjeć pacientow na koronawirus w chorownjach. To pokazuje, zo je regionalnje diferencowane postupowanje trěbne. Epidemiske połoženje dyrbi sejm tuž zaso zběhnyć.“