Zakitowarjo Mariupola wotpokazuja ultimatum – dalša diplomatija

Kijew (dpa/SN). Zakitowarjo ukrainskeho města Mariupol su ultimatum ruskeho wójska, so podać, wotpokazali. „Njebudźe žaneje kapitulacije a žanoho wotedaća bróni“, rjekny zastupowaca ministerska prezidentka Irina Wereščuk dźensa rano ukrainskim nowinarjam. Wona žadaše sej wot ruskeho wójska humanitarne koridory, zo móhli nuzu ćerpjacy ciwilisća město wopušćić. Ruska bě ukrainske jednotki wčera namołwjała, brónje złožić a město dźensa dopołdnja wopušćić. Za to chcychu wot 10 do 12 hodź. koridor zarjadować.

Při wobtřělenju wjacorych twarjenjow w ukrainskej stolicy Kijewje su wčera znajmjeńša štyrjoch ciwilistow morili. Po informacijach měšćanosty Witalija Klička su ruscy wojacy wjacore bydlenja w měšćanskim dźělu Podilskyj wobškodźili. Tež nakupowanski centrum bu trjecheny. W chemiskim zawodźe města Sumy na sewjerowuchodźe kraja je dźensa rano z dotal njeznateje přičiny wulce jědojty amoniak do atmosfery twochnył. Wobydlerjo maja w pincach abo nisko ležacych bydlenjach přebywać.