Berlin (dpa/SN). Wjacore zwjazki lěkarjow so za to wupraja, darmotne testowanja ludźi na koronawirus skónčić. Testy jenož hišće z přičinu „bychu ličbu posrědkowanych wuslědkow testow jasnje znižili“, rjekny Elke Bruns-Philipps wot zwjazka lěkarjow zjawneje strowotniskeje słužby nowinarjam. Rěčnik zwjazka akreditowanych laborow rjekny nowinarjam: „Dalewjedźenje testow bjez wosebiteje přičiny, k čemuž tež wobydlerske testy słušeja, njejsu z wida fachowych lěkarskich laborow wjace trjeba.“

Němska załožba za škit pacientow mjenowaše tajke žadanja absurdne. Ze skónčenjom darmotnych móžnosćow testowanja by wobkedźbowanje pandemije skónčene było, rjekny předsyda Eugen Brysch powěsćerni dpa. Wón pokaza na dale wysoke incidency, wulku kwotu pozitiwnych wuslědkow pola testow PCR a nadal wjele smjertnych padow.

Zwjazkowe ministerstwo za strowotnistwo bě poskitk darmotnych testow hač do 29. junija podlěšiło. Po tym maja wšitcy tež bjez symptomow dale prawo na znajmjeńša jedyn spěšnotest wob tydźeń we wotpowědnych testowanišćach přez wukubłany personal.