Brüssel (dpa/SN). Zakitowanscy ministrojo 30 čłonskich krajow NATO su so dźensa na dwaj dnjej trajace wuradźowanja w Brüsselu zetkali. Při tym ma w prěnim rjedźe wo to hić, wjerškowe zetkanje NATO kónc junija w Madridźe přihotować. Tam chcedźa rozsudźić, kak chcył wojerski zwjazk srjedźo- a dołhodobnje na wohroženje přez rusku wójnsku politiku reagować. Konkretnje planuja, wuchodnu flanku zwjazka přez přidatne wojerske jednotki zesylnić. Wosebje baltiske staty sej tole žadaja, dokelž čuja so wot Ruskeje wohrožene. Zwjazkowy kancler Olaf Scholz (SPD) bě hižo minjeny tydźeń připowědźił, zo chcył Berlin prezencu němskich wojakow w Litawskej hišće raz zesylnić. W běhu dźensnišeho dnja chcyše so na iniciatiwu USA tak mjenowana mjezynarodna kontaktna skupina Ukrainy dla zetkać. W njej koordinuja dodawanje bróni Ukrainje. NATO je w tutej naležnosći oficialnje neutralna, dokelž nochce na wojerskim konflikće mjez Ukrainu a Ruskej wobdźělena być. Ukraina žada sej dalše ćežke brónje kaž tanki a kanony, zo móhła so ruskej inwaziji wobarać.