Iniciatiwa „The Lusatia Glow“ modelowy projekt europskeje integracije

Drježdźany/Budyšin (SN/bn). „Zaměr iniciatiwy ‚The Lusatia Glow‘ (łužiske swěćenje) je wutworić syć za europsku integraciju, kotraž wuprudźuje z namjezneho ruma takrjec wot deleka horje do metropolowych regionow, a to wot Čorneho morja hač k Atlantikej. Serbja zaběraja w tym zwisku jako regionalna kultura w třikrajowym róžku rólu pósłancow mjez Prahu, Waršawu a Berlinom. Jako tak mjenowana mjeńšina su woni mysli europskeho zjednanja wosebje zwjazani a móža funkciju mostytwarcow wukonjeć. Europa woznamjenja, wotpowědujo charće EU, jednotu w diwersiće, a ju zwoprawdźić njeje prěnjorjadnje nadawk politiki, ale wobydlerjow.“ To rjekny hłowny koordinator iniciatiwy a prezident Brüsselskeje załožby Slavonic ­Europe (słowjanska Europa) David Chmelík na nowinarskej konferency ­minjeny štwórtk w Drježdźanskim Steigenbergerowym hotelu De Saxe.