Ukraina 31. róčnicu njewotwisnosće wot Moskwy woswjećiła

Kijew / Moskwa (dpa/SN). Najebać nowe ruske nadpady je Ukraina wčera dźeń njewotwisnosće woswjećiła. Přez ruske wobtřělenje na dwórnišću Čaplyne w kónčinje Dnipropetrowsk bu po informacijach prezidenta Wolodymyra Zelenskeho znajmjeńša 25 ludźi morjenych a něhdźe 50 zranjenych. Po prěnich rozprawach bu wosobowy ćah trjecheny. Wjednistwo w Kijewje přizjewi nimo toho ruske raketowe nadpady we wšelakich regionach. Podaća wójnskich stron njehodźa so njewotwisnje přepruwować. Wójna traješe srjedu dokładnje poł lěta.

Ruska bě susodny kraj 24. februara nadpadnyła. Šěsć měsacow pozdźišo dawatej so wobě stronje dobyća wěstej – najebać tysacow mortwych, zapusćenjow a sprostnjeneho wojerskeho połoženja na fronće. Zelenskyj potwjerdźi zaměr, wšitke wobsadźene kónčiny wróćo zdobyć. USA připowědźa dalšu brónjensku pomoc w hódnoće třoch miliardow eurow. Tež zwjazkowy kancler Olaf Scholz (SPD) podpěru potwjerdźi. Hromadźe z wjace hač 50 druhimi krajemi namołwjachu Němska a USA Moskwu, wójnu hnydom skónčić.